کیریر کو تباہ کرنے والی سنگین غلطیاں

آپ اکثر اپنے پیشہ ورانہ امور کی انجام دہی کے دوران ایسی کئی غلطیاں کر بیٹتھے ہیں جس سے کمپنی میں آپ کی پوزیشن کو دھچکا لگتا ہے اور بعض اوقات تو نوبت نوکری سے فارغ کیے جانے تک جا پہنچتی ہے-اگر ان غلطیوں کو درست نہ کیا جائے تو ممکن ہے کہ آپ کا کیریر تباہ و برباد ہوجائے- ہم آج اپنے آرٹیکل میں چند ایسی ہی چھوٹی چھوٹی خامیوں کا ذکر کریں گے جن پر قابو پا کر آپ اپنے مستقبل کو روشن بنا سکتے ہیں-
 

غلطیوں کو تسلیم نہ کرنا
اپنی غلطیوں کا تسلیم نہ کرنا اور ان پر بلاجواز بحث کرنا آپ کو پریشانی میں مبتلا کر سکتا ہے- بہتر ہے کہ کسی کام کے دوران پیش آنے والے مسائل سے اپنے باس کو بروقت آگاہ کریں- دیر سے آگاہ کرنے یا مختلف بہانے تراشنے کی وجہ سے آپ کی ساکھ متاثر ہوسکتی ہے-

مسلسل شکایات کی عادت
اپنے باس سے مسلسل شکایات کرنے کی عادت سے بچیے٬ یہ عادت یا رویہ آپ کی ساکھ پر منفی اثرات مرتب کرتے ہیں اور اس طرح آپ خود اپنے باس کے لیے ایک مسئلہ بن جاتے ہیں- اور اس کا آپ کو ناقابلِ تلافی نقصان بھی اٹھانا پڑ سکتا ہے-

کمپنی کے ماحول کو اپنانا
ہر کمپنی کے کچھ ایسی سماجی سرگرمیاں ہوتی ہیں جنہیں اپنانا آپ کے لیے فائدہ مند ہوتا ہے لیکن آپ انہیں نہ اپنا کر دیگر ملازمین کے نزدیک مغرور طبعیت کے مالک بن جاتے ہیں- اور اس طرح آپ اور ساتھی ملازمین کے درمیان ایک قابلِ ذکر فاصلہ قائم ہوجاتا ہے- آپ کو چاہیے کے دفتر کے ماحول کو ضرور اپنائیں اور خود کو اس کے رنگ میں رنگ لیں-

لباس کا خیال رکھنا
اپنے کام کے ساتھ ساتھ اپنے لباس کا بھی خیال رکھنا انتہائی ضروری ہے کیونکہ لباس آپ کی پوزیشن میں بہتری کا سبب بن سکتا ہے- اکثر ملازمین صرف کام پر دھیان دیتے ہیں اور لباس کو نظرانداز کردیتے ہیں جس کی وجہ سے ان کے متعلق منفی رائے قائم کر لی جاتی ہے-

ٹال مٹول سے کام لینا
کسی بھی ٹاسک کو مکمل کرنے کے معاملے میں ٹال مٹول سے کام لینا اور اسے آخری وقت تک مکمل نہ کرنا آپ ہی کو مشکل میں ڈالے گا- اس طرح آپ دوسروں کے درمیان نہ صرف سست اور غیر ذمہ دار قرار دیے جائیں گے بلکہ خود آپ پر بھی دباؤ بڑھے گا- اور اگر کمپنی کو کسی قسم کا نقصان ہوا تو ممکن ہے اس کی ذمہ داری بھی آپ ہی کے کاندھوں پر آجائے-

ای میلز کا جواب بروقت
اگر آپ ای میلز کا جواب بروقت نہیں دیں گے تو جواب کے منتظر افراد کے درمیان آپ کے بارے میں یہی تاثر قائم ہوگا کہ آپ ایک ناقابلِ بھروسہ انسان ہیں- اور یہ رویہ آپ کو غیر پیشہ ورانہ سوچ کا حامل شخص قرار دلواتا ہے- بہتر یہی ہے کہ آپ ای میلز کا جواب مناسب وقت کے اندر ضرور دیجیے اور لوگوں کے درمیان اعتماد کی فضا قائم کیجیے-

میٹنگ کی تیاری قبل از وقت
یہ مت سوچیے کہ جب میٹنگ ہوگی تو اسی وقت کچھ نہ کچھ بول لیں گے بلکہ میٹنگ کے لیے پہلے سے تیاری مکمل رکھیے- آپ کے پہلے سے سوچے گئے آئیڈیاز میٹنگ میں آپ کو مثبت اور تعمیری کردار کا مالک قرار دے سکتے ہیں-

زیادہ مداخلت یا بولنا
اپنے ساتھی ملازمین سے اچھے تعلقات قائم کرنا بہترین ہے لیکن کسی کے کام میں بھی حد سے زیادہ مداخلت یا اس سے زیادہ بات چیت کسی صورت بہتر نہیں- یہ عادت آپ اپنے کام پر تو منفی اثر ڈالتی ہی ہے بلکہ دیگر افراد کو بھی پریشانی میں مبتلا کرتی ہے- بات چیت کے لیے بہترین وقت لنچ ٹائم ہے-

بدتمیز نہ بنیے
اگر آپ کا کام اچھا ہے تو پھر بھی آپ کو اس بات کی اجازت ہرگز نہیں کہ آپ ساتھی ورکرز کا ساتھ مغرورانہ یا رویہ قائم کریں یا ان سے بدتمیزی کے ساتھ پیش آئیں- آپ کے لیے ضروری ہے کہ سب کے ساتھ خوش اخلاقی سے پیش آئیں اور ہوسکے تو دیگر ملازمین کی مدد بھی کریں-