تنہائی کے چند چونکا دینے والے اثرات

دنیا میں کون شخص ہے جس کو کبھی نہ کبھی تنہا ہونے کا احساس نہیں ہوتا، کوئی ایسا لمحہ جو اسے زندگی میں سماجی طور پر کسی سے بھی جڑے نہ ہونے کا احساس دلاتا ہے اور اس وقت یہ دنیا جو بظاہر بہت بڑی نظر آتی ہے دشمن محسوس ہونے لگتی ہے اور ہم خود کو بہت چھوٹا محسوس کرنے لگتے ہیں۔ تنہائی یا تنہا ہونے کا احساس ہر شخص پر مختلف انداز سے اثر انداز ہوتا ہے اور یہ ایسا چکر ہے جو شروع ہوتا ہے تو اس کا اختتام نہیں ہوتا، یہاں تک کہ جانوروں کے لیے بھی یہ احساس جان لیوا ثابت ہوتا ہے۔تاہم زندگی کے اس احساس کو سمجھنا آپ کو کسی تاریک غار کی گہرائیوں میں ڈوبنے سے بچانے میں مددگار بھی ثابت ہوسکتا ہے جبکہ دنیا میگزین کی ایک رپورٹ کے مطابق تنہائی کے کچھ اثرات آپ کو دنگ بھی کرسکتے ہیں۔
 

تنہا رہنے کی بجائے برقی جھٹکے قبول
ایک منٹ کے لیے تصور کریں کہ آپ کے پاس کچھ کرنے کے لیے نہ ہو، کہیں جا نہ سکتے ہوں اور کوئی بھی آپ سے بات نہ کرنا چاہتا ہو، آپ کا کام ہی بس ایک کمرے میں بیٹھ کر سوچنا ہو یا خیالی پلاؤ بنانا ہو۔ اب بتائیں کیا آپ اپنے ذہن میں گم رہ کر زندہ رہنا پسند کریں گے ، سننے میں زبردست لگتا ہے نا؟ مگر ایسا کرنا عملی طور پر انسان کے لیے ممکن ہی نہیں۔ ہاورڈ یونیورسٹی اور ورجینیا یونیورسٹی کی تحقیق کے مطابق بیشتر افراد کی نظر میں یہ تصور ہی ناقابل برداشت ہے بلکہ بیزارکن ہے چاہے اس سے بچنے کے لیے انہیں خود تکلیف ہی کیوں نہ اٹھانی پڑے وہ اس سے گریز بھی نہیں کریں گے۔ اس تحقیق کے دوران 18 سے 77 سال کی عمر کے افراد پر تجربات کرتے ہوئے انہیں چھ سے 15 منٹ تک ایک کمرے میں تنہا بیٹھنے کے لیے کہا گیا اور عمر کے فرق سے ہٹ کر نتائج یکساں ہی رہے۔ ان افراد کے لیے سوچنا مشکل ہوگیا، توجہ مرکوز کرنا مشکل ہوگیا، وہ انتہائی بیزاری اور خود کو مشکل میں محسوس کرنے لگے۔ دلچسپ بات یہ ہے کہ ایسے افراد خود کو تھکاوٹ کا شکار اور ذہنی انتشار میں مبتلا محسوس کرنے لگے جس کے باعث ان کے لیے سوچنا مشکل ہوگیا۔ محققین کا کہنا ہے کہ اپنے گھروں میں بھی لوگ ایسے حالات میں موسیقی سن کر یا موبائل فون پر گیمز کھیل کر اپنی توجہ بھٹکانے کی کوشش کرتے ہیں۔مگر اس تجربے کی خاص بات یہ تھی کہ رضاکاروں کو آپشن دیا گیا کہ اگر وہ اس کمرے سے نکلنا چاہتے ہیں تو انہیں ایک بٹن دبانا ہوگا جس سے ایک برقی شاک لگے گا مگر انہیں باہر نکال لیا جائے گا۔ تجربے کے شروع میں پیسے ملنے کے باوجود رضاکاروں نے برقی جھٹکا کھانے سے انکار کردیا تھا مگر تجربے کے دوران انہوں نے تنہا رہنے کے احساس پر کرنٹ کھانے کو ترجیح دی حالانکہ اس کمرے میں انہیں صرف 15 منٹ ہی گزارنے تھے۔

تنہائی ایک بیماری کی طرح پھیلتی ہے
آپ نے ایسی فلمیں تو دیکھی ہوں گی جن میں زومبیز یا زندہ مردے کا مرض دنیا بھر میں پھیل جاتا ہے اور تنہائی کا احساس بھی کسی مرض کی طرح پھیل سکتا ہے۔شکاگو یونیورسٹی کی تحقیق کے مطابق تنہائی بھی ایک خطرناک جراثیم کی طرح پھیل سکتی ہے، اس کا آغاز آپ کی حوصلہ شکنی سے ہوتا ہے اب چاہے وہ کسی دوست کا کوئی جملہ ہو یا کچھ اور جو غیر اطمینان بخش ہو۔اگر آپ کا مزاج خوشگوار ہے تو ہوسکتا ہے کہ آپ ان چیزوں کا نوٹس نہ لیں مگر کسی اداس دن پر یہ براہ راست آپ کے دل پر حملہ کرتی ہیں، یہ ذہن سے چپک جاتی ہیں اور اکثر دوستوں سے تعلقات بھی اس وجہ سے بگڑ جاتے ہیں جبکہ اسی مزاج کے ساتھ آپ دیگر افراد کو بھی اسی احساس کا شکار کردیتے ہیں۔ محققین کے مطابق تنہائی کے شکار افراد لاشعوری طور پر اپنے اقدامات سے خود کو مزید تنہا کرتے چلے جاتے ہیں اور یہ چیز سماجی تناؤ کا باعث بنتی ہے جس کا شکار دیگر افراد ہوتے ہیں۔تحقیق کے مطابق یہ احساس بالکل کسی چھوت کے مرض کی طرح ایک سے دوسرے میں منتقل ہوتا ہے اور اس طرح بڑے حلقے تک پھیل جاتا ہے۔ اس میں شدت کے نتیجے میں ذہنی امراض، ڈپریشن اور تنہائی کا شدید احساس بھی شکار بناسکتا ہے۔