Khadim - Makhdoom (Part – 2 & Final)

ALLAH Ta'ala Ney Insaan Ko Kun Keh Ker Kiyoon Paida Nahi Fermaya; Wo Is Baat Per Bhi Qadir Hey Keh Insaan Ko Bhi Kun Keh Ker Paida Farma Deta Magar Nahi … Kyoon?

Quran Pak Mein ALLAH Pak Ney Farmaya Jiska Mafhoom Hey Keh "Ham Ne Jinno Aur Insaan Ko Paida Fermaya Takeh Wo Hamari Ibadat Karain"

Yahan Ham Zikr Choonkeh Insaan Ki Azmat Ka Ker Rahey Hein Iss Liye Is Waqt Ham Baat Sirf Insaan Ki Karain Ge… Jinnat Key Barey Mein Phir Kabhi Baat Hogi Agar ALLAH Ne Chaha Tau.

Yani ALLAH Pak Ney Insaan Ko Apni Ibaadat Key Liye Paida Fermaya Aur Kaha Keh Rizq Tau Tumhein Ham Deinge, Doosri Makhlooqat Bhi ALLAH Pak Ki Ibaadat Kerti Hein Magar Yahan Zikr Sirf Insaan Ka Hey Kiyoon Keh Insaan Ashraful Makhlooqaat Hey. ALLAH Pak Ney Baqiah Makhlooqaat Ko Insaan Ki Khidmat Key Liye Paida Fermaya.

Yahan Thora Sa Samajhney Ki Baat Hey Aur Ghor Kerney Ki Keh ALLAH Pak Ne Insaan Ko Apney Liye Paida Fermaya Aur Deegar Makhlooqat Ko Insaan Key Liye Paida Fermaya, Inn Deegar Makhlooqaat Mein, Farishtey Aur Hoorein Bhi Shamil Hein Jokeh Noori Makhlooq Hein…Janwar, Charind, Parind, Jangli Hayaat, Shajar, Hajar, Samandar, Darya, Pahar, Aabi Makhlooq, Machhliyan, Gharz Keh Dunyawi Aur Samawi Jitni Qism Ki Bhi Makhlooqat Hein Wo Sab ALLAH Pak Ne Insaan Ke Liye Ya Yoon Kahein Keh Insaan Ki Khidmat Key Liye Paida Fermaein

Aur Insaan Ko Apney Liye Paida Fermaya (Yani Khas Apni Ibadat Key Liye) …ALLAH Ta'ala Ney Insaan Ko Kitna Bara Maqaam O Martaba Ata'a Fermaya Keh Usey Apney Liye Muntakhab Fermaya, Yahan Baat Musalman Ki Nahi Horahi, Musalman Ka Martaba Tau Aur Bhi Kahein Ziadah Hey, Yahan Tau Baat Insaan Ki Horahi Hey Jismein Muslim, Kafir, Mushrik, Munafiq Aur Bid'ati Sab Hi Shamil Hein.

Iss Pouri Guftugoo Ka Hasil Yeh Huwa Keh Tamam Makhlooqaat Khadim Hein Insaan Ki Aur Insaan Makhdoom Hey Baqi Makhlooqaat Ka (Makhdoom Yani Jiski Khidmat Ki Jaey). Ab Wo Log Ghaor Ferma'ain Jo Insaan Ko Farishtey Sey Milatey Hein…Wo Insaan Ko Farishta Keh Ker Insaan Ki Toqeer Ko Ziadah Kertey Hein Yak Eh Kam Kiyoon Ke Insaan Makhdoom Hey Jabkeh Farishta Khadim (Yeh Alag Baat Hey Keh Uski Paidaish Noor Sey Huwi Hey Jabkeh Insaan Ki Paidaish Matti Sey) Farishton Ka Hazrat Adam (A.S.) Yani Insaan Ko Sajdah Kerna Bhi (Jiska Quran Pak Mein Zikr Mojood Hey) Yeh Batata Hey Keh Insaan Farishton Sey Afzal Hey.

Yeh Tau Kaha Jasakta Hey Keh Iss Insaan Mein Farishton Wali Sifaat Ya Khusoosiyaat Hein, Kiyoon Keh Farishta Hona Alag Baat Hey Aur Farishton Wali Sifaat Hona Alag Baat. Farishton Mein ALLAH Ta'ala Ney Gunah Kerney Ki Salahiyet Hi Nahi Rakhi, Farishta Chahey Bhi Tau Gunah Nahi Ker Sakta, Ab Agar Koi Kahey Keh Farishta Gunah Nahi Kerta Tau Ismein Kamaal Ki Konsi Baat Hey Kiyoon Keh Usmein Gunah Kerney Ki Salaheyet ALLAH Ta'ala Ne Rakhi Hi Nahi,

Haan Agar Koi Yeh Kahey Keh Ek Insaan Ney Gunah Key Sarey Wasail Hotey Huwey Bhi Gunah Nahi Kia Tau Yeh Kamaal Ki Baat Hey. Iski Misaal Iss Tarah Hey Keh Ek Office Mein Rishwat Hoti Hi Nahi Hey, Agar Koi Rishwat Lena Bhi Chahey Tau Ley Nahi Sakta Aur Phir Koi Doosra Shakhs Yeh Kahey Keh Falan Banda Barra Shareef Hey Wo Rishwat Nahi Leta Tau Log Kahein Ge Keh Jab Uskey Mehekmey Mein Rishwat Wala Koi Matter Hey Hi Nahi Tau Wo Kia Rishwat Lega Ismein Tau Uski Sharafat Wali Koi Baat Hi Nahi…Lekin Agar Koi Aisey Departments Mein Kaam Kerta Hey Keh Jahan Rishwat Leney Ke Hazaar Tareeqey Hein Aur Uskey Pakrey Janey Ka Bhi Koi Khaof Ya Imkaan Nahi Hey, Phir Wo Shakhs Kehta Hey Keh Mein Rishwat Iss Liye Nahi Laita Keh Yeh Kaam ALLAH Pak Ko Pasand Nahi, Tau Yeh Waqei Kamaal Ki Baat Hey, Aur Agar Uskey Barey Mein Kaha Jaey Keh Usmein Farishton Wali Sifaat Hein Tau Yeh Ghalat Na Hoga Lekin Usko Farishta Kehna Ghalat Hoga.

Jab Sey Yeh Kaenaat Bani Hey ALLAH Ta'ala Ki Tamam Makhlooqaat Apney Apney Kamon Mein Lagi Howi Hein, Insaan Key Dunya Mein Aaney Se Pehley Bhi Suraj Chamakta Tha, Dunya Mein Din Bhi Hota Tha Aur Raat Bhi Hoti Thi, Chand Sitarey, Hawa, Pani Sab Mojood They Aur Apney Apney Kamon Mein Lagey Huwe They, Jab Hazrat Aadam (A.S. ) Ko ALLAH Pak Ney Jannat Sey Dunya Mein Utara Tau Us Waqt Dunya Mein Raat Thi…

Yeh Kaenaat Insaan Key Liye Hey Magar Insaan Iss Kaenaat Key Liye Nahi, Iski Misaal Istarah Hey Keh Hazrat Adam (A.S.) Sey Laiker Aaj Tak Arbon Kharbon Insaan Iss Dunya Mein Aaeey Aur Chaley Gaey Magar ALLAH Ki Iss Kaenaat Per Koi Faraq Nahi Parra, Yani Suraj Usi Tarah Chamak Raha Hey, Din Aur Raat Bhi Apney Apney Waqt Per Nikal Rahey Hein, Sardi, Garmi, Barish, Hawa, Aag, Pani Sab Mojood Hein Aur Unkey Kamon Mein Koi Tabdeeli Nahi Aaee Hey, Jabkeh Agar Suraj Roshni Dena Band Kerde, Hawa Chalna Band Hojaey, Barish Na Ho, Dhoop Na Nikley, Darakht Paida Na Hoon, Phal, Phool, Ajnaas, Janwer, Gosht, Doodh Aur Isi Tarah Ki Be-Shumaar Naimatein (Cheezain) Na Milein Ya Unmein Sey Koi Ek Cheez Bhi Na Milay Tau Insaan Ko Faraq Parjata Hey. Yeh Tau Qudrati Cheezein Hein Lekein Agar Ghair Qudrati Cheezain Jesey Bijli, Gas, Petrol Bhi Na Miley Tau Insaan Pareshan Hojata Hey, Kiyoon, Issliye Keh Wo Tamam Cheezain Insaan Ki Khidmat (Zuroorat) Key Liye Paida Ki Gai Hein, Jab Wo Nahi Miltein Tau Insaan Pareshaan Hojata Hey.

Isi Tarah, Jab ALLAH Pak Ney Insaan Ko Paida Fermaya Apney Liye Aur Phir Jab Insaan ALLAH Pak Ki Nahi Manta Tau Aap Samajh Saktey Hein Keh Kia Hota Hoga. Yeh Insaan Jisey ALLAH Pak Ney Apney Hathon Sey Banaya, Puri Makhlooqaat Ka Makhdoom Banaya, Ashraful Makhlooqaat Banaya, Farishton Sey Sajdah Kerwaya, Iskey Liye Jannat Ko Araasta Farmaya, Iske Liye Hoorein Banaein Aur Jitna Ghor Kertey Ja'ain Maloom Hota Jaeyga Keh ALLAH Pak Ney Insaan Key Liye Kia Kia Banaya Aur Insaan Sey Tau Sirf Abd Banney Ki Chahat Ki Gai Thi Wo Us Mabood-E-Barhaq Ka Sahih Mano Mein Abd Bhi Nahi Ban Saka? Afsos, Sad-Afsos, Kitni Takleef Ki Baat Hey, Kash Hamari Samajh Mein Aajaaey Aur Ham Bandey Ban Ja'ain.

Ham ALLAH Ko Tau Maantey Hein Magar ALLAH Ki Nahi Maantey, Jab Tak Ham ALLAH Ki Nahi Manein Ge Hamari Paidaish Ka Maqsad Pura Nahi Hoga.

Hamein Aaj Sey Hi Sachey Dil Sey Tobah Kerkey Apney Maqsad-E-Haqeeqi Ki Taraf Palat Aana Chahey'ey Takeh ALLAH Pak Ki Naraazgi Door Ho Ja'ey Aur Hamarey Upper Sey Zalim, Jaabir Aur Beydeen Hukamraro Ki Ghilaazat Door Hojaey.

Sirf ALLAH Ki Zaat Per Sacha Aqeedah Yani La Ilaha IllALLAH (Nahi Koi Mabood Magar ALLAH) Hamarey Sarey Maslon Ka Hal ALLAH Hi Key Paas Hey, Sachey Dil Sey Pukar Ker Tau Dekho, Raat Ko Uth Ker Khamoshi Sey Do (2) Aansoo Giraker Tau Dekho, Agar Aapki Dunya Na Badal Jaey Tau Mera Naam Badal Dena?

Sirf Rozaana 5 Waqt Ki Namaz Ka Taqaza Hey Aur Gunaho Sey Bachney Ka, Jannat Tau Bani Hi Musalmano Key Liye Hey, Kafir Aur Mushrik Thori Jannat Mein Ja'aingey? Unhein Tau Jannat Ki Khushboo Bhi Nahi Mileygi.

Khatam Shud