پیچر٬ ہنستا بستا شہر آج ویران کیوں؟ تالاب کے کنارے خون کی طرح سرخ

امریکی ریاست اوکلاہاما کے ایک شہر پیچر (PICHER) میں کئی برسوں سے ویرانی کا بسیرا ہے اور ہر طرف وحشت نے ڈیرے ڈال رکھے ہیں- 20 ہزار سے زیادہ آبادی والے پرُ رونق قصبے پر آخر کیا بیتی تھی؟ آئیے وائس آف امریکہ کے توسط سے جانتے ہیں-

ہزاروں افراد کی آبادی والے اس قصبے میں آج شاید ہی کوئی رہتا ہو- سن 2009 میں وفاقی حکومت نے وہاں کے تمام رہائشیوں کو معاوضے کے چیک دے کر انہیں شہر چھوڑ دینے کی ہدایت کی تھی۔
 

قریب ہی گرجا گھر کی عمارت ہےجس کی دیکھ بھال کرنے والا اور وہاں بیٹھ کر عبادت کرنے والا اب کوئی باقی نہیں رہا۔ اسکول کے عقب میں کئی ایکڑوں پر پھیلا ہوا راکھ کا ڈیڑھ سو فٹ بلند ڈھیر ہے۔ جس کے گرد اب لوہے کی سنگلاخ باڑ لگا دی گئی ہے۔ قصبے کی بربادی کا آغاز اسی راکھ سے ہوا۔

آپ کو پیچر میں بجلی کے کھمبے، سٹریٹ لائٹس، تاریں اور عمارتوں کو جاتے کنکشن نظر آئیں گے ۔ لیکن کسی گھر میں کوئی بلب روشن دکھائی نہیں دے گا۔ اکثر گھروں کے دروازے چوپٹ کھلے پڑے ہیں۔ بہت سے گھروں میں تو آپ کو سامان بھی پڑا نظر آئے گا۔ کچن میں بھی کچھ چیزیں مل جائیں گی ۔ کتے بلیاں اور کئی چھوٹے بڑے جنگلی جانور بھی دکھائی دیں گے ۔ لیکن کوئی انسان نظر نہیں آئے گا۔