خاتون جنت:حضرت فاطمہ رضی اﷲ تعالی عنھا

بسم اﷲ الرحمن الرحیم

اس نیلے آسمان کے نیچے اور زمین کے اس سینے پر محسن انسانیت ﷺکو سب سے عزیزترین اگر کوئی شخصیت تھی تو وہ آپﷺ کی لخت جگر حضرت فاطمہ رضی اﷲ تعالی عنھاہی تھیں۔آپ ﷺنے اپنی اس جگرگوشہ کوجنت میں عورتوں کی سردار قرار دیا۔ایک روایت کے مطابق آپﷺ حضرت فاطمہ الزہرارضی اﷲتعالی عنھاکی خوشبو سونگھ کرفرماتے کہ ان میں سے مجھے بہشت کی خوشبوآتی ہے کیونکہ یہ اس میوہ جنت سے پیداہوئی ہیں جو شب معراج جبرائیل نے مجھے کھلایاتھا۔ام المومنین حضرت خدیجۃ الکبری رضی اﷲتعالی عنھاکے بطن سے آپﷺ کی کل چار شہزادیاں تھیں،حضرت زینب،حضرت رقیہ ،حضرت ام کلثوم اور حضرت فاطمہ الزہرارضی اﷲتعالی عنھن،ان میں سے حضرت فاطمہ سب سے چھوٹی اور سب سے زیادہ لاڈلی تھیں۔بڑی تینوں آپﷺ کی عمرعزیزمیں ہی انتقال فرماگئی تھیں،صرف حضرت فاطمہ الزہرارضی اﷲتعالی عنھاوصال مبارک کے وقت موجود تھیں۔آپﷺ نے ان کے کان میں کچھ کہاتووہ رونے لگیں ،بیٹی کوروتادیکھ کرآپﷺ نے ایک بارپھر ان کے کان میں کچھ کہاتووہ مسکرانے لگ گئیں۔بعد کے دنوں میں حضرت فاطمہ نے وضاحت کی پہلی دفعہ آپﷺ نے مجھے اپنے وصال کی خبردی تو میں رونے لگی،بعد میں فرمایاکہ میرے خاندان میں سے سب سے پہلے آپ ہی مجھ سے آن ملوگی تو میں مسکرانے لگی۔یہ فرط محبت کاایک اچھوتاانداز تھا۔حضرت فاطمہ الزہرارضی اﷲتعالی عنھاکی پیدائش مبارکہ بعثت نبوی ﷺکے پانچویں سال ہوئی،یہ صبح صادق کاوقت تھا،جمعۃ المبارک کادن اور21ربیع الثانی کی متبرک تاریخ تھی۔آپ ؓخاص قریش،آل بنی ہاشم،بنی عبدالمطلب اور اہل بیت نبویﷺمیں سے تھیں،آپؓ کاشمار پنجتن پاک شریف میں ہوتاہے۔امت مسلمہ کے ہاں آپ ؓکی عقیدت ومودت کسی بھی اور خاتون سے کہیں زیادہ ہے۔آپؓ کی پہچان صرف آپ کی ذات مبارکہ یاآپ کاحسب و نسب ہی نہیں ہے بلکہ آپ کی آل والاد اور آپ کی نسل بھی اسلام اور تاریخ اسلام کے شاندار ابواب اور عالم انسانیت میں قابل فخروقابل ستائش ہے۔

آپ ؓکی فضیلت عالیہ کے باعث آپ سے منسوب القابات کی بہتات ہے۔آپ ؓکے مشہور القابات ’’زہرا‘‘اور’’سیدۃ النساء العالمین‘‘ہیں اس لیے آپﷺ نے آپؓ کودنیاوجنت کی خواتین کی سردارقراردیاتھا۔آپؓ کی مشہور کنیت ’’ام الائمہ‘‘ہے ،اس لیے کہ اثناعشریہ کے کل ائمہ معصومین آپؓ کی نسل سے ہی تعلق رکھتے ہیں۔آپ ؓ کے دو فرزندان حضرت امام حسن اورحضرت امام حسین رضی اﷲتعالی عنھماکے باعث آپؓ کو’’ام السبطین‘‘اور’’ام الحسنین‘‘بھی کہاجاتاہے۔آپؓ کو خاتون جنت،الطاہرہ،الزکیہ،المرضیہ،السیدہ وغیرہ سے بھی یاد کیاجاتاہے۔پیدائش کے بعد آپﷺنے بذات خود آپؓکی تربیت کی،ام المومنین حضرت خدیجہ بھی ظاہر ہے کہ اس تربیت میں آپﷺکے ساتھ ساتھ تھیں۔بی بی خدیجہ کے وصال کے وقت آپؓ بہت کم سن تھیں چنانچہ قریش کی متعدد خواتین نے حضرت فاطمہ کواپنی زیرتربیت لیے رکھا،ان میں فاطمہ بنت اسدجو حضرت ابوطالب کی زوجہ محترمہ تھیں ،ام الفضل جو حضرت عباس بن عبدالمطلب کی زوجہ محترمہ تھیں،حضرت ام ہانی جو آپﷺ کی پھوپھی تھیں،اسماء بنت عمیس جو حضرت جعفرطیارکی زوجہ محترمہ تھیں اور حضرت صفیہ بنت امیرحمزہ بن عبدالمطلب کانام خاص طور پر ملتاہے۔یہ خواتین اہل بیت کی سرخیل خواتین ہیں۔ان سورج چاندستاروں کے زیرتربیت رہنے والی خاتون کو واقعی حضرت فاطمہ الزہرارضی اﷲتعالی عنھاہی ہونا زیب دیتاہے۔بی بی پاکؓ کی پیدائش اور تربیت کازمانہ مکی زندگی کا دورابتلاو آزمائش تھا،چنانچہ آپؓ نے ابتداء اسلام کے بہت ہی کٹھن دورکابنظرغائرمشاہدہ کیا۔ابولھب کامکان اوربی بی خدیجہ کے گھرکی ایک ہی دیوار ہواکرتی تھی،صبح جب آپ ﷺگھرسے نکلنے کے لیے دراقدس کھولتے توام جمیل زوجہ ابولھب نے کانٹوں کا ڈھیر لگارکھاہوتا،بی بی صاحبہؓآگے بڑھ کر اپنی ننھی منی انگلیوں سے پہلے راستہ صاف کرتیں پھر پدربزرگوارروانہ ہوتے اور اس کوشش میں انگلیوں کے مقدس و محترم و معصوم پور کانٹوں کے باعث خون سے رنگین ہو چکے ہوتے تھے۔اہل مکہ جب کبھی نبی علیہ السلام پر اوجھری پھینک کر جسم اطہرکوآلودہ کردیتے تو بی بی پاک ؓپانی سے غسل دیتی تھیں اور ساتھ کے ساتھ اشکوں کی برسات بھی جاری رہتی جس پر سب سے بڑامشفق باپ سب سے زیادہ اطاعت کیش بیٹی کو تسلی ارشاد فرماتے تھے اور اﷲ تعالی کی مدد پر یقین کی تلقین کرتے۔

ہجرت کاواقعہ تاریخ اسلام میں سنگ میل کی حیثیت رکھتاہے۔مردوں کے بعد خواتین اسلام نے بھی ہجرت کی ،چنانچہ حضرت فاطمہ الزہرارضی اﷲتعالی عنھانے حضرت فاطمہؓ بنت اسد،ام المومنین حضرت سودہ ؓاورام المومنین حضرت عائشہؓ کے ساتھ ایک قافلے میں ہجرت کی۔مدینہ طیبہ آمد کے بعد حضرت فاطمہ الزہرارضی اﷲتعالی عنھافاطمہ بنت اسد کے زیرتربیت رہیں،پھر جب حضرت ام سلمی کو ام المومنین کا مرتبہ ملاتو بی بی پاک ؓکو آپﷺ نے ان کے زیرتربیت دے دیا۔ام المومنین حضرت ام سلمی فرماتی ہیں میں نے بی بی پاکؓکوادب سکھاناچاہاتو خداکی قسم وہ پہلے سے ہی مودب تھیں۔خاتون جنت سے کئی حضرات نے شادی کی خواہش کااظہارکیاان میں حضرت ابوبکرؓاور حضرت عمر ؓبھی شامل تھے ،لیکن ہربار وحی کے انتظارکاجواب ملا۔چنانچہ آپﷺ نے حضرت علی کو بلاکر فرمایامجھے اﷲ تعالی نے حکم دیاہے کہ فاطمہ بنت محمدﷺکی شادی آپؓسے کروں۔یکم ذولحجہ2ہجری کو 500درہم حق مہر کے عوض یہ نکاح عمل میں آیا۔جہیزکے سامان کے لیے آپﷺ نے حضرت مقدادؓبن اسود،حضرت سلمان فارسیؓ اور حضرت بلال ؓکو رقم دے کربھیجا۔جہیزمیں ایک قمیص،سرڈھانپنے کاایک کپڑا،ایک سیاہ کمبل،کھجورکے پتوں سے بناایک بستر،موٹے ٹاٹ کے دوفرش،چارچھوٹے تکیے،ہاتھ سے آٹاپیسنے والی ایک چکی،کپڑے دھونے کے لیے تانبے کاایک برتن،پانی کے لیے چمڑے کی ایک مشق،لکڑی کاایک گلاس،مٹی کے دوپیالے،مٹی کی ایک صراحی،زمین پربچھانے کاایک چمڑا،ایک سفیدچادراورایک لوٹاشامل تھا۔اس مختصرسے جہیزکودیکھ کر چشمگان نبوی ﷺآبدیدہ ہو گئیں اور برکت کے لیے دعالبوں پر پہنچ گئی۔

رخصتی کے وقت حضرت فاطمہ الزہرارضی اﷲتعالی عنھا’’اشہب‘‘نامی اونٹنی پرسوارتھیں اوراسکی مہارحضرت سلمان فارسی نے تھامی تھی۔رخصتی کے جلوس میں ازواج مطہرات سب سے آگے آگے تھیں اوراونچی آواز سے رجزگارہی تھیں،خاص طورپر حضرت عائشہ نے جو رجز گایااس میں فرمایا کہ حضرت فاطمہ کوساتھ لے کر چلو،اﷲتعالی نے ان کے ذکرکوبلندکیاہے اوران کے لیے انہیں کے خاندان کے ایک پاک و پاکیزہ فرد کوشوہربنایاہے۔ام المومنین حضرت ام سلمی اورام المومنین حضرت حفضہ نے بھی اونچی اونچی آواز میں رجز گائے۔آپﷺ اس دوران خواتین سے کہتے جارہے تھے کہ رجزپڑھیں اور اﷲتعالی کی تکبیربلند کریں اور کوئی ایسی بات نہ کریں جس سے اﷲتعالی ناراض ہو۔بنی ہاشم ننگی تلواریں لیے ہمرکاب تھے،مسجد نبویﷺکے طواف کے بعد بی بی پاک ؓکوحضرت علی کے گھرمیں اتاراگیا۔آپﷺ نے پانی منگوایااور اس پر دم کر کے بی بی پاکؓاور حضرت علی کے سربازؤں اورسینے پر چھڑکااوردعافرمائی کہ اے بارالہ میں ان کی نسل کو شیطان مردودسے تیری پناہ میں دیتاہوں۔حضرت علی ؓکے حجرے اورحجرہ حضرت عائشہ صدیقہؓ کے درمیان ایک اور مسلمان کا حجرہ تھا۔شادی کے بعد آپﷺ نے اس مسلمان سے کہاتواس نے حضرت علی سے اپناحجر ہ تبدیل کرلیا،گویا لخت جگرسے اتنی قلیل مسافت بھی مزاج نبویﷺپر گراں تھی۔آپﷺ جب فجرکی نماز کے لیے نکلتے تو حضرت علی کے حجرے کادروازہ بجاتے اور فرماتے کہ اے اہل بیت نماز کے لیے چلو۔شادی کے بعد خواتین نے حضرت فاطمہ الزہرارضی اﷲتعالی عنھاکوطعنے دیے کہ تیراشوہر غریب ہے ،آپﷺ نے فرمایا کہ فاطمہ،میں نے تیری شادی ایک ایسے فرد سے کی ہے جواسلام میں سب سے اول ہے،علم میں سب سے اکمل اور حلم میں سب سے افضل ہے،پھرآپﷺ نے فرمایا اے فاطمہ کیاتمہیں نہیں معلوم کی دنیاوآخرت میں علیؓ میرابھائی ہے۔اس پر حضرت فاطمہ الزہرارضی اﷲتعالی عنھامسکرانے لگیں اور مطمئن ہوگئیں۔

بی بی پاکؓ کی شادی کے بعد کی زندگی کل خواتین کے لیے مشعل راہ ہے۔غربت اور تنگ دستی نے گھرمیں ڈیرے ڈالے رکھے لیکن شکایت کوکوئی لفظ زبان پر نہ آیا۔جب بھی بیمارہوتیں تو حضرت علی کچھ لانے کاپوچھتے توفرماتیں میرے والد محترمﷺنے مجھے منع کیاہے کہ میں آپ سے کچھ مانگوں۔اگرکوئی صبروقناعت کی زندہ تصویرکودیکھناچاہے توآپؓ کی زندگی کامطالعہ کرے۔ایک بار کچھ لونڈی غلام کہیں سے آئے تو بی بی پاکؓ پدربزرگوارﷺکے پاس تشریف لے گئیں اور اپنے ہاتھ پر پڑے ہوئے گٹے دکھاکر عرض کی کہ آٹاپیس پیس کر ہاتھ زخمی ہوگئے ہیں ،کوئی خدمت گار عطا کر دیں تو جواب میں انکارملا کہ ابھی بدرکے یتیم باقی ہیں۔فاقوں پر فاقے گزرجاتے تھے لیکن آل رسولﷺ کے اس گھرانے کی چوکھٹ سے کوئی سوالی خالی نہ جاتاتھا۔یہ وہ گھرانا ہے جس پر درودپڑھے بغیرمسلمانوں کی نماز ہی مکمل نہیں ہوتی ۔صبرواستقامت کا پہاڑیہ خاتون جنت وصال نبویﷺ کے کچھ ہی ماہ بعد3جمادی الثانی 11ہجری کو اس دارفانی سے کوچ فرماگئیں۔ان ہستیوں سے تعلق و عقیدت ایمان کی نشانی ہے اور ان سے بغض و عداوت ،شروفساداور طاغوت کی نشانیاں ہیں۔