چند عام اشیاﺀ کی وہ منفرد خصوصیات جو آپ نہیں جانتے

ہم روزانہ سینکڑوں اشیاﺀ استعمال کرتے ہیں جو کہ ہماری روزمرہ زندگی کا ایک حصہ ہوتی ہیں جیسے کہ بال پوائنٹ٬ نیا لباس٬ برتن اور جہاز کی کھڑکیاں وغیرہ- لیکن ان اشیاﺀ کی بنیادی استعمال سے تو ہم واقف ہوتے ہیں لیکن ہم ان کی اکثر منفرد خصوصیات سے کے بارے میں بالکل کچھ نہیں جانتے- مثال کے طور پر ہم بال پوائنٹ کا استعمال کچھ لکھنے کے لیے کرتے ہیں لیکن ہم یہ نہیں جانتے کہ بال پوائنٹ کے ڈھکن میں سوراخ کس مقصد کے تحت کیا جاتا ہے؟ جی ہاں آج آپ کو روزانہ استعمال ہونے والی چند عام اشیاﺀ کی وہ منفرد خصوصیات بتائیں گے جو آپ نہیں جانتے-
 

بال پوائنٹ کے ڈھکن میں موجود سوراخ
اکثر بال پوائنٹ کے ڈھکن میں کو اوپر کی طرف ایک سوراخ موجود ہوتا جس کے بارے میں لوگ سمجھتے ہیں کہ یہ قلم کو خشک ہونے سے بچاتا ہے- لیکن ایسا نہیں ہے بلکہ یہ سوراخ ان بچوں کا دم گھٹنے سے بچاتا ہے جو کھیل کھیل میں یہ ڈھکن اپنے گلے میں اتار لیتے ہیں- ڈھکن میں موجود اس سوراخ کے ذریعے ہوا ان کے جسم میں داخل ہوتی رہتی ہے-

ہوائی جہاز کی کھڑکیوں میں سوراخ کی موجودگی
ہوائی جہاز کی کھڑکی میں موجود اس سوراخ کو بنانے کی دو وجوہات ہوتی ہیں- پہلی تو یہ کہ جب جہاز بلندی کی طرف جاتا ہے تو جہاز کے اندرونی ہوا کے دباؤ اور بیرونی دباؤ میں بڑا فرق ہوتا ہے اور یہ سوراخ اس دباؤ کو منظم کرتا ہے- دوسری وجہ یہ ہے کہ یہ سوراخ کھڑکیوں کو دھندلا ہونے سے بچاتا ہے-

نئے لباس کے ساتھ اضافی کپڑا
ریڈی میڈ ملبوسات تیار کرنے والی اکثر کمپنیاں اپنے لباس کے ساتھ اضافی کپڑا بھی فراہم کرتی ہیں- تاہم اکثر لوگ اس کپڑے کے حقیقی استعمال سے ناواقف ہوتے ہیں- کمپنیوں کی جانب سے یہ نیا کپڑا اس لیے فراہم کیا جاتا ہے تاکہ آپ کپڑے دھونے کے لیے جو ڈیٹرجنٹ استعمال کرتے ہیں اس کا تجربہ اس کپڑے پر کرسکیں اور جان سکیں کہ آپ کا ڈیٹرجنٹ نئے کپڑے سے مطابقت رکھتا ہے یا نہیں- اس سے آپ کا پورا لباس خراب ہونے سے بچ جاتا ہے-

جینز کی پتلون میں چھوٹی جیبیں
یقیناً آپ نے بھی دیکھا ہوگا کہ جینز کی پتلون میں اس حد تک چھوٹی جیبیں بنی ہوئی ہوتی ہیں جن کا بظاہر کوئی مقصد یا استعمال سمجھ نہیں آتا- یہ جیب دراصل 19ویں صدی کان کنوں کے لیے خصوصی طور پر تیار کی گئی تھیں- یہ کان کن اس جیب میں گھڑی رکھتے تھے جو کہ پیشہ ورانہ امور کی انجام دہی کے دوران ٹوٹنے سے محفوظ رہتی تھی-

جوتوں کے اطراف میں سوراخ
کھیلوں اور ورزش کے لیے استعمال کیے جانے والے جوتوں کے اطراف میں سوراخ بنائے جاتے ہیں- ان سوراخ کا واضح مقصد یہی ہوتا ہے کہ جوتوں میں موجود خراب ہوا خارج ہوجائے اور تازہ ہوا ان کے اندر داخل ہوجائے- اس عمل سے نہ صرف جوتے بالکل پاؤں بھی خراب ہونے سے بچ جاتے ہیں-

برتن کے ہینڈل میں سوراخ کی موجودگی
کھانے پکانے والے برتن کے ہینڈل میں سوراخ کی موجودگی کا سبب یقیناً ایک تو یہ ہے کہ اس برتن کو آسانی سے لٹکایا جاسکے- لیکن اس کے علاوہ آپ کھانا تیار کرنے والے چمچ کو بھی برتن کے ساتھ ہی سوراخ میں منسلک کرسکتے ہیں تاکہ بوقتِ ضرورت تلاش نہ کرنا پڑے-