تفصیلات کے مطابق توشہ خانہ ریفرنس میں اِشتہاری ملزم میاں محمد نواز شریف کی زمینیں، ملز شیئرز کی تمام تفصیلات سامنے آ گئیں، اِلیکشن کمیشن آف پاکستان، ایف بی آر اور ایس ای سی پی نے نیب کو ریکارڈ فراہم کردیا جس کے مطابق نواز شریف کے 4 کمپنیوں میں شیئرز ہیں۔
نیب کے تفتیشی افسر محمد راحیل اعظم کی جانب سے احتساب عدالت میں رپورٹ جمع کرائی گئی جس میں اُنہوں نے بتایا کہ نواز شریف کے اثاثوں کے لئے ایف بی آر، الیکشن کمیشن اور ایس ای سی پی کوخطوط ارسال کئے تھے۔
نیب رپورٹ کے مطابق محمد بخش ٹیکسٹائل ملز میں نواز شریف کے 4 لاکھ 67 ہزار 950 شیئرز موجود ہیں، حدیبیہ پیپر ملز میں نواز شریف 3 لاکھ 43 ہزار 425 شیئرز کے مالک نکلے،جبکہ حدیبیہ انجینئرنگ کمپنی میں نواز شریف کے شیئرز کی تعداد 22 ہزار 213 ہے۔
رپورٹ میں بتایا گیا ہے کہ اتفاق ٹیکسٹائل ملز میں میاں نواز شریف 48 ہزار 606 شیئرز کے مالک ہیں، ان کے مختلف نجی بینکوں میں 3 غیر ملکی کرنسی سمیت 8 اکاؤنٹس شامل ہیں، علاوہ ازیں 5 بینک اکاؤنٹس میں 6 لاکھ 12 ہزار روپے موجود ہیں۔
نیب کی رپورٹ کے مطابق غیر ملکی کرنسی والے اکاؤنٹس میں 566 یورو، 698 امریکی ڈالرز اور 498 برطانوی پاؤنڈز موجود ہیں۔
نیب کی رپورٹ کے مطابق ایل ڈی اے، لاہور اور شیخو پورہ کے ایڈیشنل ڈپٹی کمشنرز، مری کے اسسٹنٹ کمشنر اور گلیات ڈویلپمنٹ اتھارٹی نے بھی رپورٹ فراہم کی ہے، نواز شریف اور ان کے زیر کفالت افراد کے نام لاہور، شیخو پورہ ، مری اور ایبٹ آباد میں بھی جائیدادیں ہیں جبکہ مری میں بنگلہ، چھانگلہ گلی ایبٹ آباد میں 15 کینال کا مکان اور اپر مال لاہور پر جائیداد شامل ہے۔
نیب رپورٹ میں نواز شریف اور ان کے زیر کفالت افراد کے نام 1752 کینال سے زائد زرعی اراضی شامل ہے، لاہور کے موضع مانک میں 936 کینال، موضع بڈو کسانی میں 299 کینال زرعی اراضی شامل ہے۔
رپورٹ میں مزید بتایا گیا کہ لاہور کے موضع مال رائے ونڈ میں 103 کینال، موضع سلطان کے میں 312 کینال ،ضلع شیخو پورہ کے موضع منڈیالی میں 14 کینال اور موضع فیروز وطن میں 88 کینال اراضی شامل ہے۔
ایکسائز اینڈ ٹیکسیشن آفس لاہور اور اسلام آباد کے مطابق سابق وزیراعظم نواز شریف کے نام پر 3 گاڑیاں اور 2 ٹریکٹرز درج ہیں جن میں ایک لینڈ کروزر، 2 مرسڈیز بینز بھی شامل ہیں۔