بلاشبہ سرور کائنات حضرت محمدﷺ کی طرز زندگی تمام عالم اسلام بلکہ تمام انسانوں کے لئے ہدایت کا سرچشمہ ہے۔ رسولؐ کے احکامات پر عمل کرنا کرنا ہم سب پر لازم ہے، اور اسی کی بنیاد پر دنیا اور آخرت میں ہمیں کامیابی نصیب ہوگی۔
عمرہ ادائیگی کی اہمیت و فضیلت سے تمام لوگ واقفیت رکھتے ہیں لیکن کیا آپ جانتے ہیں کہ وہ کونسا وقت ہے جس میں عمرہ کرنا رسولؐ کے ہمراہ حج کرنے کے برابر ہے؟
حضرت عبداللہ بن عباس رضی اللہ عنہ سے مروی ہے وہ کہتے ہیں کہ: " اللہ کے رسول صلی اللہ علیہ وسلم نے ایک انصاری عورت سے پوچھا کہ تمہارے لیے ہمارے ساتھ حج کرنے پر کیا رکاوٹ ہے؟ اس نے جواب دیا کہ ہمارے پاس صرف دو اونٹ ہیں، ایک پر میرا بیٹا اور اس کے والد حج کرنے چلے گئے اور دوسرا ہمارے لیے چھوڑ دیا تاکہ ہم اس سے کھیتی کو سیراب کرنے کا کام لیں،
جس پر آپ صلی اللہ علیہ وسلم نے ارشاد فرمایا، جب ماہ رمضان آئے تو اس میں عمرہ کر لینا، کیوںکہ رمضان المبارک میں عمرہ کرنا حج کرنے کے برابر ہے۔ اور صحیح مسلم کی روایت میں ہے کہ میرے ساتھ حج کرنے کے برابر ہے۔