ترک اداکار انگین آلتان کی پاکستان آمد، ٹوئٹر پر ’پاکستان اِن ترکی‘ نامی ٹوئٹر ہینڈل کی جانب سے ٹوئٹ جاری۔
تفصیلات کے مطابق ترک ڈرامہ ’ارطغرل غازی‘ میں مرکزی کردار ادا کرنے والے ترکش اداکار انگین آلتان آج صبح لاہور پہنچ گئے ہیں، اس حوالے سے سماجی رابطے کی ویب سائٹ ٹوئٹر پر ’پاکستان اِن ترکی‘ نامی ٹوئٹر ہینڈل کی جانب سے ٹوئٹ جاری کیا گیا ہے، ٹوئٹ میں لکھا ہے کہ ’ارطغرل غازی کے مرکزی اداکار انگین آلتان ابھی لاہور ایئر پورٹ پہنچے ہیں، وہ ایک نجی کاروباری کمپنی کی دعوت پر پاکستان کے مختصر دورے پر آئے ہیں'۔
علاوہ ازیں ہیش ٹیگ کے ساتھ ٹوئٹ میں مزید لکھا ہے کہ 'پاکستان ارطغرل کو خوش آمدید کہتا ہے، انگین آلتان کے استقبال کے لیے ہمارے ساتھ شامل ہوں'۔
ٹوئٹ کے ساتھ ایک تصویر بھی شئیر کی گئی ہے، جو کہ ابھی لاہور ایئرپورٹ پر ہی لی گئی ہے، اس تصویر میں اُن کے ساتھ دو اور لوگ بھی موجود ہیں۔
یاد رہے کہ ارطغرل غازی کے مرکزی اداکار انگین آلتان نے کچھ عرصہ قبل اپنے ایک ویڈیو پیغام میں کہا تھا کہ وہ جلد پاکستان آئیں گے۔