عام طور پر سننے کو ملتا ہے کہ دونوں بھائیوں کی ایک ہی دن شادی ہوئی یا دو بہنیں ایک ہی دن شادی کے بندھن میں بندھ گئیں۔ لیکن ایسا سننے میں پہلی بار آیا ہے کہ ماں اور بیٹی نے ایک ہی دن شادی کرلی۔
بھارت میں ایک 53 سالہ خاتون اور اس کی 27 سالہ بیٹی ایک ہی دن شادی کے بندھن میں بندھ گئے۔ انڈیا ٹائمز وپورٹ کے مطابق اس خاتون کا نام بیلی دیوی ہے جس کا شوہر ہریہر 25 سال قبل دنیا سے جاچکا تھا۔ اس کی تین بیٹیاں اور دو بیٹے تھے جنہیں اس نے اپنے دیور کے ساتھ مل کر پالا پوسا۔ اس کی دو بیٹیوں اور دو بیٹوں کی شادیاں ہو چکی تھیں اور سب سے چھوٹی بیٹی اندو باقی رہ گئی۔
گزشتہ دنوں ان کے شہر گورکھ پور میں اجتماعی شادیوں کی ایک تقریب منعقد ہوئی جس میں ان دونوں ماں بیٹیوں کے ہاتھ بھی پیلے ہوگئے۔
رپورٹ کے مطابق بیلی دیوی نے اپنی اُسی 55 سالہ دیور جگدیش کے ساتھ شادی کی جس کے ساتھ مل کر اس نے اپنے بچوں کی پرورش کی تھی۔ اندو کی شادی 29 سالہ راہول کے ساتھ ہوئی۔ اپنے ساتھ ہی اپنی ماں کی بھی شادی ہونے پر اندو کا کہنا تھا کہ میری ماں اور چچا نے ہم سب بہن بھائیوں کی بہت اچھی پرورش کی اورہم خوش ہیں کہ اب وہ ایک دوسرے کی دیکھ بھال کریں گے۔
واضح رہے کہ اس اجتماعی شادیوں کی تقریب میں کل 63 لڑکیوں کی شادیاں کروائی گئیں ہیں۔