گلستان جوہر میں ماسیوں نے گھر سے 14 لاکھ کا سامان لوٹ لیا، سی سی ٹی وی فوٹیج منظرِ عام پر آگئی۔
تفصیلات کے مطابق کراچی کے علاقے گلستان جوہر بلاک نائن میں گھر میں کام کرنے والی 2 ماسیاں گھر کے ساتھ ساتھ تجوری بھی صاف کر گئیں، چند روز قبل ہی کام پر رکھی گئی ماسیاں 14 لاکھ سے زائد مالیت کا سامان لوٹ کر فرار ہو گئیں۔
متاثرہ خاندان نے فوری واقعے کی پولیس کو خبر کی، تاہم پولیس کی جانب سے واقعے کا مقدمہ گلستان جوہر تھانے میں درج کر لیا گیا، واقعے کی سی سی ٹی وی ویڈیو بھی سامنے آگئی ہے۔
متاثرہ خاندان کے مطابق ماسیاں 6 لاکھ روپے نقد، 8 تولہ طلائی زیورات اور 270 برطانوی پاؤنڈ لے اڑی ہیں ، متاثرہ خاندان نے بتایا کہ دونوں ماسیوں کو ایک ہفتے قبل کام پر رکھا تھا تاہم دونوں نے ہی اپنا شناختی کارڈ ابھی تک نہیں دیا تھا۔
یاد رہے کہ چند روز قبل ڈیفنس میں بھی اس قسم کا واقعہ پیش آ چکا ہے۔