فلم حنا سے بالی ووڈ میں انٹری دینے والی پاکستان کی معروف ترین اداکارہ زیبا بختیار نے اداکار رشی کپور کے چھوٹے بھائی راجیو کپور کی موت پر شدید دکھ کا اظہار کیا ہے۔
بھارتی میڈیا کو دیے گئے انٹرویو میں زیبا بختیار کا کہنا تھا کہ ''میں نے جب بھی رندھیر کپور سے راجیو کپور کی طبعیت کے بارے میں پوچھا تو انہوں نے ہمیشہ مجھے ان کی طبعیت ٹھیک بتائی اور اب اچانک ان کی موت نے مجھے حیران کر دیا ہے''۔
اداکارہ نے کہا کہ ''راجیو کپور کی یوں اچانک موت کی خبر نے مجھے تشویش میں مبتلا کر دیا ہے، میرے پاس اپنے جذبات بیان کرنے کے لیے الفاظ نہیں ہیں''۔
زیبا بختیار نے کہا کہ ''رندھیر کپور نے گزشتہ کچھ سالوں میں بہت غم برداشت کیے ہیں، پہلے اپنی ماں کو، پھر رشی کپور کو اور اب چھوٹے بھائی راجیو کپور کو کھو دیا''۔
ان کا کہنا تھا کہ ''ہم نے جو ایک ساتھ وقت گُزارا وہ تفریح اور ہنسی مذاق پر مبنی تھا، راجیو کے ساتھ میری تمام یادیں بےحد خوشگوار ہیں''۔
یاد رہے کہ بھارتی میڈیا رپورٹس کے مطابق رشی کپور کے چھوٹے بھائی راجیو کپور کی موت دل کا دورہ پڑنے کی وجہ سے ہوئی۔ راجیو کپور کی موت کی خبر اُن کی بھابھی اور رشی کپور کی اہلیہ نیتو کپور نے اپنے انسٹاگرام پیغام کے ذریعے دی۔
واضح رہے کہ راجیو کپور ایک اداکار ہونے کے ساتھ ہی پروڈیوسر اور ڈائریکٹر بھی تھے۔