پاکستان کے معروف اداکار ہمایوں سعید نے کئی سالوں پہلے بھارت کے دورے پر بالی ووڈ کے نامور اداکار عامر خان کے گھر مہمان بننے کے بارے میں مداحوں کو بتا دیا۔
پرائیوٹ ٹی وی چینل کے ایک پروگرام میں شرکت کے دوران ہمایوں سعید نے انکشاف کیا کہ وہ بالی وڈ کی مشہور فلم گجنی کے ایک کردار کے لیے بھارت گئے تھے جہاں انہوں نےعامر خان سے ان کے ممبئی میں واقع گھر میں ملاقات بھی کی تھی۔
ہمایوں سعید نے بتایا کہ وہ 3 روز کے لیے عامر خان کے گھر رہے، اور عامر خان نے مجھے دیکھ کر کہا تھا کہ آپ اس کردار کے لیے کافی گڈ لوکنگ ہیں لیکن اور اُس کردار کی ڈیمانڈ کچھ اور تھی۔
ہمایوں سعید کا کہنا تھا کہ ہمیں بہت مزہ آیا، میں نے عامر خان سے دو مرتبہ ملاقات کی اور انھوں نے ہمیں بہت سے دیسی کھانے اور پکوان پیش کیے اور پھر ہم پاکستان واپس آئے۔
بات چیت کے دوران ہمایوں سعید نے مزید انکشاف کیا کہ بالی ووڈ اداکار رشی کپور کے ساتھ بھی ان کے دوستانہ تعلقات تھے اور انہیں جوانی پھر نہیں آنی 2 میں کاسٹ کرنے کے خواہش مند تھے۔
اداکار نے مزید بتایا کہ رشی کپور کے انتقال سے کچھ روز قبل ہی انھوں نے بالی ووڈ اداکار کی صحت کے حوالے سے ان سے بات کی تھی۔