یہ کیا کھسر پھسر ہو رہی ہے؟ فواد چوہدری اور سعد رفیق کی اسمبلی میں گفتگو کے چرچے سوشل میڈیا پر وائرل

وزیراعظم عمران خان کے خلاف تحریک عدم اعتماد پر ووٹنگ کے لیے بلائے گئے اسمبلی کے ہنگامہ خیز اجلاس کو سپیکر قومی اسمبلی اسد قیصر کی جانب سے ساڑھے 12 بجے تک کے لیے ملتوی کر دیا گیا تھا جو تاحال شروع تو نہ ہوسکا مگر اجلاس کے ملتوی ہونے کے فوری بعد فواد چوہدری اور خواجہ سعد رفیق کی ویڈیو سوشل میڈیا پر خوب وائرل ہوگئی۔

ویڈیو میں دیکھا جا سکتا ہے کہ فواد چوہدری اور خواجہ سعد رفیق دونوں پاس بیٹھ کر کھسر پسر کر رہے ہیں۔ دونوں کے انداز سے تو یہ معلوم ہو رہا ہے کہ جیسے پتہ نہیں کتنے پرانے دوست ہیں اور کسی اہم مسئلے پر گفتگو کی جا رہی ہے۔ میڈیا پر ایک دوسرے پر تنقید کے نشتر برسانے والے پاکستان تحریک انصاف اور ن لیگ کے رہنما خواجہ سعد رفیق اور فواد چوہدری کی قومی اسمبلی اجلاس میں یہ دوستانہ گفتگو سوشل میڈیا پر زیرِ بحث ہے کہ آخر اس گفتگو سے ملکی سیاست میں کچھ نیا دھماکہ تو نہیں ہونے جا رہا۔

واضح رہے کہ قومی اسمبلی سیکریٹریٹ کا کہنا ہے کہ تحریک عدم اعتماد پر ووٹنگ ہر صورت آج ہو گی۔ خط کے معاملے پر ایوان میں بحث نہیں کی جا سکتی، اسپیکر قومی اسمبلی کوئی اور ایجنڈا نہیں لے سکتے۔ آج ووٹنگ نہ کرانے پر اسپیکر کے خلاف توہینِ عدالت کی کارروائی کی جا سکتی ہے۔ ویڈیو آپ بھی دیکھیں: