کچھ سال قبل نمرہ اور اسد ایک کم عمر جوڑے کی شادی ہوئی تھی جس پر لوگوں نے کئی طرح کی باتیں بنائیں تھیں کہ یہ تو بچے ہیں، کم عقل ہیں، ان کو سمجھ نہیں ہے، ان کی شادی کیسے کروا دی؟ وہیں لاکھوں لوگوں نے اس کو خوب سراہا اور ایک اچھی مثبت مثال قرار دی کہ بچوں کا نکاح ان کے بالغ ہونے کے بعد ان کی مرضی سے کر دیا جائے۔ نمرہ اور اسد کی شادی اپنے وقت کی ایک خوبصورت شادی کہا جائے تو کچھ کم نہ ہوگا۔ انہوں نے اور ان کے گھر والوں نے چھوٹی عمر میں شادی کروا کر دیگر والدین کو یہ نصیحت دی کہ بچوں کی مرضی سے شادی کروائیں، نکاح جیسے پاک رشتے کو عام بنائیں تاکہ بچے باغی نہ بنیں۔ نمرہ اور اسد کو سوشل میڈیا سے خوب شہرت ملی، ٹی وی شوز، مارننگ شوز میں بھی ان کو مدعو کیا گیا۔
جہاں کچھ لوگوں نے انگلیاں اٹھائیں، وہیں زیادہ تر لوگوں نے ان کو پسند بھی کیا۔
آج کل دعا زہرہ کی شادی کا معاملہ زیرِ بحث ہے کہ جب بچی 18 سال کی نہیں ہے تو شادی کیسے؟ بچی بالغ نہیں ہوئی تو نکاح کیسے ہوگیا۔ بہرحال وہ کیس بالکل الگ ہے۔ لیکن سوشل میڈیا پر سب ہی کو اظہارِ رائے کی آزادی ہے لہٰذا جو کوئی جو کچھ چاہتا ہے بول پڑتا ہے۔ اب دعا کی اپنے شوہر ظہیر کے ساتھ ایک تصویر اور نمرہ اسد کی ایک تصویر سوشل میڈیا پر خوب شیئر کی جا رہی ہے جس میں ان کی شادی سے متعلق باتیں لکھی جا رہی ہیں اور دونوں کا موازنہ ہو رہا ہے۔
لوگوں کی رائے ہے کہ نمرہ اور اسد نے بھی تو کم عمری میں شادی کی تھی، ان پر کسی نے تنقید نہیں کی بلکہ ان کو عزت دی گئی، ہر طرف ان کی پزیرائی ہوئی اور دعا ظہیر نے کم عمری میں شادی کی تو ان پر سوالات اٹھائے جا رہے ہیں۔ جبکہ کچھ صارفین کہہ رہے ہیں کہ نمرہ اور اسد کی شادی ایک اعلیٰ مثال تھی کیونکہ انہوں نے اپنے گھر والوں کے ساتھ مرضی سے سب کی رضامندی سے کھلے عام خوشی کے ساتھ نکاح جیسے پاک بندھن کو اپنایا جبکہ دعا ظہیر نے والدین کی رضامندی کے بغیر بنا بتائے گھر سے جا کر نکاح کیا۔
ان حالات میں نمرہ اور اسد جیسی مثالیں کم ہی ملتی ہیں۔ نمرہ کاظمی نے بھی گھر سے بھاگ کر اور شادی کی، لیکن اس کی ویڈیوز اور تصاویر میں یہ نظر آ رہا ہے کہ وہ خوش ہے اپنے خاوند کے ساتھ۔ وہیں اگر دعا کی تصاویر دیکھیں تو وہ ڈری سہمی نظر آرہی ہے۔ اگر وہ اپنے گھر میں خوش ہے تو شادی کی تصاویر کہاں ہیں؟ کیا وہ شادی کے لیے تیار ہی نہیں ہوئی؟ کیا وہ کسی خطرے میں ہے؟ بہرحال آج بھی یہ تمام تر سوالات اپنی جگہ موجود ہیں۔ اس کے والدین کی گفتگو اس کے بیانات کی نفی کر رہی ہے۔ مگر ہر کوئی دعا کے لیے دعاگو ہے کہ وہ خوش ہو، سلامت رہے اب جبکہ شادی کر ہی لی ہے تو اس کا گھر بسا رہے۔