پاکستان میں غیر قانونی طور پر مقیم افغان باشندے اب کراچی کی صنعتی تنظیموں کے ریڈار پر آگئے ہیں، جس کے بعد شہر کی مختلف صنعتی تنظیموں نے اپنی ممبر صنعتوں کو باضابطہ خطوط ارسال کردیے ہیں۔
کورنگی ایسوسی ایشن آف ٹریڈ اینڈ انڈسٹری (کاٹی) اور نارتھ کراچی ایسوسی ایشن آف ٹریڈ اینڈ انڈسٹری (نکاٹی) نے اپنی ممبر صنعتوں کو ہدایت کی ہے کہ غیر قانونی طور پر رہائش پذیر غیر ملکیوں، خصوصاً افغان شہریوں کو صنعتوں میں ملازمت پر نہ رکھا جائے، اور ان کے خلاف سیکیورٹی فورسز کے کریک ڈاؤن میں مکمل تعاون کیا جائے۔
دوسری جانب سائٹ ایسوسی ایشن نے بھی فیکٹری مالکان کو ہدایت کی ہے کہ غیر قانونی طور پر مقیم افغان باشندوں کے بارے میں معلومات سے فوری مطلع کیا جائے۔
ذرائع کے مطابق کراچی کے سات صنعتی علاقوں میں قائم ہزاروں صنعتوں میں لاکھوں افراد کام کر رہے ہیں، جن میں غیر قانونی طور پر مقیم افغانیوں کی ایک بڑی تعداد بھی شامل ہے۔
یہ اقدام حکومت کی جانب سے دی گئی ڈیڈ لائن ختم ہونے کے بعد ملک بھر میں غیر قانونی طور پر رہائش پذیر افغان باشندوں کے خلاف جاری کریک ڈاؤن کے سلسلے میں اٹھایا گیا ہے۔