گرمی کی شدت کی وجہ سے آجکل اے سی ہر گھر میں چلانا اہم ضرورت بن گیا ہے لیکن گرمی میں سکون دینے والا اے سی اس وقت شدید الجھن میں ڈال دیتا ہے جب دیوار پر اس سے گرنے والا پانی دھبوں کی صورت اختیار کر لیتا ہے۔ اے سی سے لیک ہونے والا پانی نہ صرف کمرے کی خوبصورتی خراب کرتا ہے بلکہ دیوار کو نقصان بھی پہنچاتا ہے۔ اس آرٹیکل میں ہم آپ کو بتائیں گے کہ اے سی سے دیوار پر پڑنے والے نشان کو کیسے ختم کیا جاسکتا ہے۔

پانی کے نشان دیوار سے ختم کرنے کا طریقہ

سب سے پہلے تو اے سی کی مرمت کروانی ضروری ہے کیوں کہ اگر دیوار پر دوبارہ روغن بھی کروالیا جائے تو اس کے باوجود بھی لیکج سے دیوار پر نشان پڑتا ہی رہے گا۔ اس کے بعد ہاتھوں میں ربر کے دستانے پہن لیں اور ایک بالٹی میں آدھا حصہ پانی اور ایک کپ بلیچ ڈال کر ملائیں۔ بلیچ ملے پانی کو کسی پرانے اور صاف تولیہ سے دیوار پر کئی بار پھیریں تاکہ نشان صاف ہوجائیں۔ یہ دھیان رکھیں کہ پانی میں ایک کپ سے زیادہ بلیچ نہ ڈالا جائے۔

اسفنج کی مدد سے دیوار کیسے صاف کریں؟

اس کے علاوہ ایک طریقہ یہ بھی ہے کہ بلیچ والے پانی کو اسفنج کی مدد سے دھبے والی دیوار پر لگایا جائے اور 20 منٹ کے لئے چھوڑ دیا جائے اس کے بعد کسی نم کپڑے سے دیوار پونچھ دیں تو دیوار سے لیکج کے نشانات غائب ہوجائیں گے۔