وفاقی وزیر داخلہ رانا ثناء اللہ نے سابق وزیراعظم عمران خان کو مشورہ دیا ہے کہ وہ عید الفطر اطمینان سے گزاریں۔
نجی ٹی وی چینل کے پروگرام میں گفتگو کرتے ہوئے انہوں نے چیئرمین پاکستان تحریک انصاف (پی ٹی آئی) عمران خان کے خلاف جاری مقدمات کے حوالے سے اظہار خیال کیا۔ انہوں نے کہا کہ وفاقی حکومت عمران خان کے خلاف کسی قسم کا آپریشن کرنے کا کوئی ارادہ نہیں رکھتی۔
پاکستان مسلم لیگ (ن) کے رہنما کا کہنا تھا کہ لاہور ہائی کورٹ نے عمران خان کو قانونی طریقے سے نہیں بلکہ غیر قانونی طور پر ہراساں کرنے سے روکا ہے۔
پنجاب انتخابات کے حوالے سے سپریم کورٹ کے فیصلے سے متعلق وفاقی وزیر نے کہا کہ کسی بھی جج کی تعیناتی کے پیچھے لابنگ ہی نظر آتی ہے۔ اسی لابنگ کے نتیجے میں آج سپریم کورٹ میں 8 اور 7 کی تقسیم نظر آرہی ہے۔