امریکی وزارت خارجہ کے ترجمان نے کہا ہے کہ سابق وزیر اعظم عمران خان کی گرفتاری پر تمام مظاہرین پُرامن طور پر اپنی شکایات کا اظہار کریں۔
چیئرمین پاکستان تحریک انصاف (پی ٹی آئی) کی گرفتاری پر امریکا کا بھی رد عمل سامنے آگیا۔ ترجمان امریکی وزارت خارجہ کے مطابق امریکا کسی ایک امیدوار یا سیاسی جماعت پر پوزیشن نہیں رکھتا۔
ترجمان کا کہنا تھا کہ پوری دنیا میں جمہوری اقدار کی عزت اور قانون کی حکمرانی کا مطالبہ کرتے ہیں۔ پاکستانی حکام کو چاہیے کہ حقوق اور جمہوری اصولوں کے مطابق تحمل سے جواب دیں۔
دوسری طرف ترجمان یورپی یونین نے بھی اس حوالے سے بیان جاری کرتے ہوئے کہا کہ موجودہ صورتحال میں تحمل کا مظاہرہ کرنے کی ضرورت ہے۔ پاکستان کے مسائل خود پاکستانی عوام نے ہی حل کرنے ہیں۔ بات چیت اور قانون کی حکمرانی کے ذریعے موجودہ مسائل کا حل ممکن ہے۔
خیال رہے کہ گزشتہ روز عمران خان کو اسلام آباد ہائیکورٹ کے احاطے سے نیب کیس میں گرفتار کرلیا گیا تھا۔ نیب کے اعلامیے کے مطابق انہیں القادر ٹرسٹ کیس میں گرفتار کیا گیا تھا۔
عمران خان کو آج نیب اور توشہ خانہ کیس میں احتساب عدالت میں پیش کیا جائے گا۔