امریکہ نے اقوام متحدہ کی سلامتی کونسل میں ایک قرارداد پیش کی ہے جس میں حماس کی مذمت کرتے ہوئے اسرائیل کو ’اپنے دفاع کا حق‘ دینے پر زور دیا گیا ہے۔
عرب نیوز کے مطابق سنیچر کو امریکہ کی قراردار پیش کرنے سے دو روز قبل ہی برازیل کو غزہ میں امداد کی اجازت دینے کے لیے انسانی بنیادوں پر جنگ بندی کا مطالبہ کرنے کی قرارداد کو مسترد کیا گیا تھا۔امریکہ کی جانب سے بیان اس وقت سامنے آیا ہے جب اقوام متحدہ غزہ میں انسانی بنیادوں پر جنگ بندی کی درخواست کر رہا ہے اورغزہ کی صورتحال کو ’تباہ کن‘ قرار دے رہا ہے۔اقوام متحدہ نے کہا ہے کہ ’دو ہفتوں میں پہلی بار رفح کے راستے غزہ کی پٹی میں بھیجے جانے والے 20 امدادی ٹرک ان 12 لاکھ فلسطینیوں کے لیے ’سمندر میں ایک قطرے‘ کے برابر ہیں۔ جو جنگ کے دوران غزہ میں محصور امداد کے منتظر ہیں۔‘حماس کی جانب سے کیے جانے والے حملے کے نتیجے میں 1400 اسرائیلی ہلاک ہونے کے بعد اسرائیل کی جانب سے جوابی کارروائی میں اب تک 4300 افراد ہلاک ہو چکے ہیں۔عرب نیوز کے مطابق ’امریکہ نے اسرائیل کے مختلف علاقوں پر سات اکتوبر کو حماس کی جانب سے کیے جانے والے راکٹ حملوں کے مذمت کرتے ہوئے حماس پر مزید حملے کرنے کا الزام عائد کیا ہے۔قرارداد کے مسودے میں کہا گیا ہے کہ ’اسرائیل چارٹر کے آرٹیکل 51 کے تحت اپنے انفرادی یا اجتماعی دفاع کا بنیادی حق حاصل ہے۔‘اسرائیل کا نام لیے بغیر مزید کہا گیا کہ ’دہشت گردی کے خلاف جنگ میں ’رکن ریاست کو بین الاقوامی قوانین کی پاسداری اور خاص طور پر بین الاقوامی انسانی حقوق، پناہ گزینوں اور انسانی قانون کے تحت اپنی تمام ذمہ داریوں عمل کرنا چاہیے۔‘اسرائیلی فوجی غزہ کی پٹی کے ساتھ سرحد پر گشت کر رہے ہیں۔ (فوٹو: اے ایف پی)دوسری جانب ایمنسٹی انٹرنیشنل نے غزہ کی پٹی پر اسرائیل کے انتقامی حملوں کو ’تباہ کن‘ قرار دیتے ہوئے کہا ہے کہ اسرائیل کے ’غیرقانونی راکٹ حملوں کو دستاویزی شکل دی گئی ہے، جس میں بڑے پیمانے پر عام شہریوں کی ہلاکتیں ہوئیں اور جنگی جرائم کے طور پر ان کی تحقیقات ہونی چاہیے۔‘امریکہ نے سنیچر کو قرارداد کا مسودہ جاری کیا اور کونسل کے ارکان سے اتوار کی صبح اپنے تاثرات پیش کرنے کی درخواست کی۔عام فلسطینی شہریوں کا ذکر نہ کرتے ہوئے امریکی متن میں ’شہری آبادی سمیت تمام پناہ کی تلاش کرنے والوں کے تحفظ کا مطالبہ کیا ہے۔‘قرارداد میں غزہ میں امدادی سامان کی مسلسل فراہمی کا مطالبہ کرتے ہوئے اقوام متحدہ، مصر اور اردن سمیت دیگر ممالک سے کہا گیا ہے کہ ’وہ اس اہم اقدام میں امریکہ کے ساتھ کھڑے ہوں۔‘امریکہ نے رکن ممالک پر زور دیا ہے کہ ’وہ حماس کی مالی معاونت پر پابندی لگائیں۔‘ (فوٹو: روئٹرز)امریکی مسودے میں رکن ممالک پر زور دیا گیا ہے کہ وہ ’دہشت گردی کی مالی معاونت کو روکنے کے لیے اپنی کوششیں کریں اور حماس کی مالی معاونت پر پابندی لگائیں۔‘’تمام ممالک سے مطالبہ کیا جاتا ہے کہ وہ اقوام متحدہ کی کوششوں کی حمایت کریں تاکہ ہمسایہ ممالک میں کشیدگی اور تنازع کو بڑھنے سے روکا جا سکے۔ حزب اللہ اور دیگر مسلح گروپوں کی طرف سے تمام حملوں کو فوری طور پر بند کرنے کا مطالبہ کیا جائے، جو قرارداد 1701 کی واضح خلاف ورزی ہے۔‘قرارداد میں ایران سے یہ بھی مطالبہ کیا گیا ہے کہ وہ ’مسلح ملیشیا اور دہشت گرد گروہوں کو تمام ہتھیاروں اور متعلقہ مواد کی برآمد بند کر دے جو پورے خطے کے امن و سلامتی کو خطرے میں ڈال رہے ہیں۔‘