اسلام آباد۔28جنوری (اے پی پی):موٹروے پولیس نے بہادری کا مظاہرہ کرتے ہوئے چکدرہ ٹال پلازہ کے قریب بارات میں شامل دولہے کی گاڑی میں شارٹ سرکٹ سے لگنے والی آگ پر قابو پا لیا۔ ترجمان موٹر وے پولیس کے مطابق بارات صوابی سے سوات جارہی تھی۔
انہوں نے کہا کہ گاڑی میں آتشزدگی کی اطلاع پر ڈیوٹی پر موجود پٹرولنگ افسران نے بہادری کا مظاہرہ کرتے ہوئے فوری طور پر مسافروں کو گاڑی سے باہر نکالا اور موٹروے پولیس نے آگ بجھانے والے آلات کی مدد سے گاڑی کو جلنے سے بھی بچا لیا، کسی قسم کا جانی نقصان نہیں ہوا۔ ترجمان موٹر وے نے کہا ہے کہ دولہا اور باراتیوں نے موٹروے پولیس کی بہادری کو سراہا اور بروقت کاروائی کے لیے شکریہ بھی ادا کیا۔