اسلام آباد۔1فروری (اے پی پی):دفتر خارجہ کی ترجمان ممتاز زہرہ بلوچ نے کہا ہے کہ پاکستان کی حکومت اور عوام پیر 5 فروری کو یوم یکجہتی کشمیر بھرپور جوش و جذبہ سے منائیں گے۔ جمعرات کو یہاں پریس بریفنگ میں انہوں نے کہا کہ اس دن پاکستانی اور دنیا بھر میں رہنے والے کشمیری، کشمیری عوام کے ساتھ ان کے ناقابل تنسیخ حق خودارادیت کے حصول کے لیے ان کی منصفانہ جدوجہد میں یکجہتی کا اعادہ کرتے ہیں۔
انہوں نے کہا کہ ماضی کی طرح یوم یکجہتی کشمیر کو روایتی جوش و جذبے کے ساتھ منانے کے لیے ایک وسیع پروگرام ترتیب دیا گیا ہے۔ ترجمان نے کہا کہ پاکستان اقوام متحدہ کی سلامتی کونسل کی قراردادوں کے مطابق جموں و کشمیر تنازعہ کے منصفانہ اور پرامن حل کے لیے اپنے کشمیری بھائیوں اور بہنوں کی سیاسی، سفارتی اور اخلاقی حمایت جاری رکھے گا۔