راولپنڈی ۔2فروری (اے پی پی):اینٹی نارکوٹکس اتھارٹی(اے این ایف )نے منشیات سمگلنگ کے خلاف 8 کارروائیوں میں 36 کلو گرام منشیات برآمدکر کے7 ملزمان گرفتارکر لیے ۔اے این ایف ترجمان کے مطابق لاہور ایئرپورٹ پر کارگو آفس سے برطانیہ بھیجے جانے والے پارسل سے 6 کلو گرام ہیروئن برآمدکرکے ملزم گرفتارکیا گیا۔ فیصل آباد ائیرپورٹ پر بحرین جانے والے مسافر سے ایک کلوگرام آئس برآمدکی گئی۔اسلام آباد ایئرپورٹ پر قطر جانے والے مسافر سے 750 گرام چرس اور 448 گرام آئس برآمدکی گئی۔
لاہور ایئرپورٹ پر دبئی جانے والے مسافر سے 83 ہیروئن بھرے کیپسولز برآمدکیے گئے۔ملتان ایئرپورٹ پر شارجہ جانے والے مسافر سے 950 گرام آئس برآمد کرکے ملزم گرفتارکیا گیا۔رنگ روڈ پشاور کے قریب ملزم سے 26 کلوگرام چرس برآمدکی گئی۔نادرہ چوک طورخم کے قریب سے 684 گرام آئس برآمدکی گئی۔ڈیرہ اسماعیل خان میں ملزم سے 600 گرام چرس برآمدکی گئی۔ترجمان اے این ایف نے بتایا کہ گرفتار ملزمان کے خلاف انسدادِ منشیات ایکٹ کے تحت مقدمات درج کرکے مزید تفتیش شروع کردی گئی ہے ۔