لاہور۔2فروری (اے پی پی):نگران وزیرصحت پنجاب پروفیسرڈاکٹرجاویداکرم نے جنرل ہسپتال میں 72کروڑروپے کی لاگت سے خریدی گئی جدید ایم آرآئی اور سی ٹی سکین مشینوں کا افتتاح کردیا۔ پرنسپل امیرالدین میڈیکل کالج پروفیسرڈاکٹرمحمد الفریدظفرنے جمعہ کوافتتاحی تقریب میں پروفیسرڈاکٹرجاویداکرم کو بریفنگ میں بتایا کہ ایل جی ایچ میں سب سے زیادہ ٹراما کیسز آتے ہیں جن کی بروقت تشخیص و علاج کےلئے ایم آر آئی اور سی ٹی سکین نہایت اہمیت کے حامل ہیں،اب کسی مریض کو ٹیسٹ کےلئے ہسپتال سے باہر نہیں جانا پڑے گا۔
اس موقع پر ایم ایس پروفیسر ڈاکٹر ندرت سہیل، ایچ او ڈی ریڈیالوجی ڈاکٹرعظمی حبیب، انتطامی ڈاکٹرز اور ذرائع ابلاغ کے نمائندوں کی کثیر تعداد نے شرکت کی۔بعدازاں پروفیسرڈاکٹرجاویداکرم نے ایم آرآئی اور سی ٹی سکین مشینوں کا معائنہ کیا اور معیار کا جائزہ لیا۔ نگران صوبائی وزیرصحت نے پریس کانفرنس سے خطاب کرتے ہوئے کہا کہ وزیراعلی پنجاب سیدمحسن نقوی کے ویژن کے مطابق جنرل ہسپتال لاہورمیں مریضوں کوجدید ایم آرآئی اور سی ٹی سکین مشینوں کا تحفہ دے دیاگیاہے۔ایم آرآئی اور سی ٹی سکین مشینوں میں زیادہ سے زیادہ سکین اور بہترین رزلٹ کی صلاحیت موجودہے۔انہوں نے کہا کہ پنجاب کی نگران حکومت سوسے زائد سرکاری ہسپتالوں میں 96ارب روپے کی لاگت سے ری ویمپنگ کر رہی ہے۔پنجاب کی نگران حکومت نے عوام کی نیک نیتی سے خدمت کی ہے۔عوام سیدمحسن نقوی کی نگران حکومت کو ہمیشہ اچھے الفاظ میں یادکرے گی۔پروفیسرڈاکٹرجاویداکرم نے کہا کہ جنرل ہسپتال میں جدید ایم آرآئی اور سی ٹی سکین مشینوں کی پروسیسینگ میں خصوصی کاوش پر پرنسپل سردار الفریدظفراور ان کی ٹیم کومبارکباداور شاباش دی۔ انہوں نے کہا کہ پنجاب کی نگران حکومت اللہ کی عدالت میں سرخروہے۔ہر منصوبے کو دل و جان سے مکمل کروایاہے۔پنجاب کےعوام کےلئے آسانیاں پیداکرنے کی پوری کوشش کی۔صحافیوں سے بات چیت کرتے ہوئے پرنسپل پروفیسر الفرید ظفر نے بتایا کہ لاہور جنرل ہسپتال میں صرف پنجاب ہی نہیں بلکہ ملک کے دیگر حصوں سے بھی روزانہ اوسطا 8ہزار سے زائد مریض علاج ومعالجے کے لئے ایمرجنسی و آوٹ ڈور میں آتے ہیں جبکہ ہسپتال کی اپ گریڈیشن کے بعد مریضوں کو مزید سہولیات آسانی کے ساتھ دستیاب ہوں گی۔