بیجنگ۔6فروری (اے پی پی):چین میں پاکستان کے سفیر خلیل ہاشمی نے کہا ہے کہ چین پاکستان چاروں موسموں کی دوستی گزشتہ سات دہائیوں پر محیط ہے اور دونوں ممالک نے ہر موقع پر ایک دوسر ے کا بھرپور ساتھ دیا ہے۔
منگل کے روز پا کستا نی سفیر نے چینی قوم کو بہار تہوار اور چینی نئے سال کی آمد پر مبادکباد د یتے ہو ئے چینی میڈ یا گروپ کوخصو صی انٹر ویو میں کہا کہ چین کی جانب سے پیش کردہ بیلٹ اینڈ روڈ نے گزشتہ دس سال میں بہت سے ٹھوس ثمرات حاصل کیے ہیں ۔سی پیک جو کہ بی آر آئی کا ایک فلیگ شپ پراجیکٹ ہے اس کی وجہ سے پاکستان نے اقتصادی اور سماجی میدان میں کافی فوائد حاصل کیے ہیں ، خاص طور پر انفراسٹرکچر اور انرجی کے میدان میں چین کے تعاون سے کئی پراجیکٹس تکمیل کو پہنچے ہیں اور اب سی پیک کے اگلے مرحلے کا آغاز ہو رہا ہے۔انہوں نے کہا کہ اس تمام عرصے کے دوران چین پاکستان دوستی مزید گہری ہوئی ہے اور متعدد شعبوں میں فریقین کے مابین فائدہ مند تعاون جاری ہےاور آئندہ آنے والے عرصے میں اقتصادی، سماجی اور دیگر حوالوں سے یہ تعاون مزید گہرا ہو گا ۔