اسلام آباد۔8فروری (اے پی پی):جڑواں شہروں اسلام آباد اورراولپنڈی میں پولنگ کے دوران ماحول مجموعی طور پر پرامن رہا۔ جمعرات کو الیکشن 2024ء کے موقع پر الیکشن کمیشن کی جانب سے جڑواں شہروں میں عوام کے حق رائے دہی کیلئے بہترین انتظامات کئے گئے۔ اس موقع پر سکیورٹی اداروں کی جانب سے عوام کے جان و مال کے تحفظ اور کسی بھی ناخوشگوار واقعہ کے سدباب کیلئے انتہائی مؤثر انتظامات کئے گئے۔
سپیکر قومی اسمبلی راجہ پرویز اشرف نے اپنا ووٹ گوجر خان جبکہ مسلم لیگ (ن) کے امیدواروں ڈاکٹر طارق فضل چوہدری، محمد حنیف عباسی اور دانیال چوہدری نے اپنے اپنے حلقوں میں اپنے ووٹ ڈالے ،دیگرجماعتوں کے الیکشن میں حصہ لینے والے قومی و صوبائی اسمبلیوں کے امیدواروں نے بھی اپنا حق رائے دہی استعمال کیا۔ پولنگ سٹیشنوں کے باہر عوام لائنوں میں رہے اور اس موقع پر انہوں نے انتہائی جوش و خروش سے اپنے حق رائے دہی کو استعمال کیا۔