اسلام آباد۔11فروری (اے پی پی):متحدہ عرب امارات میں پاکستان کے سفیر فیصل نیاز ترمذی نے محنت کشوں کی بدلتی ہوئی ضروریات کو پورا کرنے اور ہنر مندی کی نقل و حرکت کی شراکت داری کو فروغ دینے کے لئے جدید طریقے اختیار کرنے کی ضرورت پر زور دیا ہے ۔
دفتر خارجہ کی طرف سے سماجی رابطے کی سائٹ ایکس پر ہفتہ کو جاری ٹویٹ میں کہا ہے کہ ان خیالات کا اظہار متحدہ عرب امارات میں پاکستان کے سفیر فیصل نیاز ترمذی نے ابوظہبی ڈائیلاگ (اے ڈی ڈی)کی ساتویں وزارتی مشاورت سے خطاب کے دوران کیا۔اے ڈی ڈی ایک منفرد مکالمہ ہے جو مزدوروں کی نقل مکانی سے متعلق مسائل کو حل کرنے کے لئے 17 خلیجی اور ایشیائی ممالک کو اکٹھا کرتا ہے۔سفیر فیصل نیاز ترمذی نے مزدوروں کی نقل و حرکت کے مسائل کے حل اور تارکین وطن مزدوروں کے حقوق کے تحفظ میں فورم کے منفرد کردار کو اجاگر کیا۔انہوں نے گرین ملازمتوں میں خواتین کی شمولیت پر اے ڈی ڈی کی دلچسپی کو بھی سراہا۔ انہوں نے مزدوروں کی بدلتی ہوئی ضروریات کو پورا کرنے اور ہنر مندی کی نقل و حرکت کی شراکت داری کو فروغ دینے کے لئے جدید طریقے اختیار کرنے کی ضرورت پر زور دیا۔انہوں نےآب و ہوا کی تبدیلی اور تارکین وطن کی صحت سے متعلق مسائل سے نمٹنے کی عالمی اہمیت پر بھی روشنی ڈالی۔