اسلام آباد۔22اپریل (اے پی پی):وزیرِ اعظم محمد شہباز شریف نے ایران کے صدر ڈاکٹر ابراہیم رئیسی سے فارسی میں گفتگو کی اور ایرانی شعرا کے پاکستان کے حوالے سے فارسی اشعار بھی پڑھے۔پیر کو وزیراعظم آفس میڈیا ونگ سے جاری بیان کے مطابق ایرانی صدر کے دورہ پاکستان پر فارسی زبان میں خیر مقدم کرتے ہوئے وزیراعظم نے کہا کہ چشمِ ماہ روشن دلِ ما شاد، آپ کو دیکھ کر ہماری آنکھیں ٹھنڈی ہوئیں اور دل خوش ہوا۔وزیرِ اعظم نے ایرانی صدر کو علامہ تقی بہار کے پاکستان کے بارے فارسی میں کلام “درود بر پاکستان” بھی پڑھ کر سنایا۔
ہمیشہ لطف خداباد یارِ پاکستان
بہ کین مباد فلک با دیارِ پاکستان
پاکستان پر اللہ تعالیٰ کا ہمیشہ فضل و کرم جاری رہے اور آسمان پاکستان سے کبھی ناراض نہ ہو۔وزیرِاعظم نے ایرانی صدر سے گفتگو میں فارسی میں شعر بھی پڑھاجس میں ان کے دورہ پاکستان کا بھرپور خیرمقدم اور انہیں بار بار پاکستان آنے کی دعوت دی۔وزیرِ اعظم کی فارسی میں گفتگو پر شرکاء کے چہروں پر مسکراہٹیں پھیل گئیں۔ایرانی صدر و وفد وزیرِاعظم کے فارسی زبان پر عبور کو دیکھ کر خوشگوار حیرت میں مبتلا ہوگئے۔وزیرِ اعظم کی فارسی میں گفتگو اور اشعار سن کر شرکاء داد دئیے بغیر نہ رہ سکے۔