اسلام آباد: وزیر اعظم شہباز شریف 4 جون کو سرکاری دورے پر چین روانہ ہوں گے۔
ترجمان دفتر خارجہ کے مطابق وزیر اعظم شہباز شریف کو دورے کی دعوت چینی صدر اور وزیر اعظم کی جانب سے دی گئی ہے۔ شہباز شریف 8 جون تک چین کے سرکاری دورے پر رہیں گے۔
وزیر اعظم شہباز شریف کے دورہ چین کے 3 حصے ہوں گے۔ وزیر اعظم چینی دارالحکومت بیجنگ کے علاوہ ژیان اور شنزن بھی جائیں گے۔
شہباز شریف کی چین کے صدر شی جن پنگ سے ملاقات ہو گی۔ وزیر اعظم کی چینی ہم منصب لی کیانگ کے ساتھ وفود کی سطح پر بات چیت بھی ہو گی۔
یہ بھی پڑھیں: 170 سعودی اور پاکستانی کمپنیوں کا سرمایہ کاری کیلئے حتمی پلان تیار
ترجمان کے مطابق وزیر اعظم کی چیئرمین اسٹینڈنگ کمیٹی نیشنل پیپلز کانگریس اور اہم محکموں کے سربراہان سے بھی ملاقاتیں طے ہیں۔ وزیراعظم کے دورے کا ایک اہم پہلو کارپوریٹ ایگزیکٹوز سے ملاقاتیں ہوں گی۔