پاکستان میں سونے کی قیمتوں نے ایک اور جست لگائی، جہاں فی تولہ نرخ میں 3100 روپے کا حیران کن اضافہ ہوا۔ آل پاکستان جیمز اینڈ جیولرز ایسوسی ایشن کے مطابق، تازہ اضافے کے بعد سونے کی فی تولہ قیمت 2 لاکھ 80 ہزار 500 روپے تک جا پہنچی، جو تاریخ کی نئی بلند ترین سطح ہے۔
اسی طرح، 10 گرام سونا بھی اپنی چمک دکھاتے ہوئے 2 لاکھ 40 ہزار 484 روپے کی قیمت پر پہنچ گیا، جس میں 2 ہزار 658 روپے کا اضافہ ریکارڈ کیا گیا۔
عالمی صرافہ بازار میں بھی سونے کی قیمتیں رکنے کا نام نہیں لے رہیں۔ تازہ اضافے میں فی اونس سونا 31 ڈالرز بڑھ کر 2 ہزار 693 ڈالرز کی سطح پر پہنچ چکا ہے، جو ایک نیا سنگ میل ثابت ہو رہا ہے۔
یاد رہے کہ صرف گزشتہ روز ہی سونے کی قیمت میں 1 ہزار روپے کا اضافہ دیکھا گیا تھا، جس نے مہنگائی کے ستائے عوام کو مزید پریشانی میں مبتلا کر دیا۔