9 مئی جلاؤ گھیراؤ کیس: انسداد دہشتگردی عدالت نے فیصلہ محفوظ کر لیا

نو مئی کے پرتشدد واقعات سے متعلق شیر پاؤ پل پر تقاریر اور جلاؤ گھیراؤ کیس میں انسداد دہشت گردی عدالت لاہور نے تمام شواہد اور دلائل مکمل ہونے کے بعد فیصلہ محفوظ کر لیا ہے۔ کوٹ لکھپت جیل میں قائم خصوصی عدالت کے جج ارشد جاوید نے کیس کی سماعت کی۔ تھانہ سرور روڈ پولیس کی جانب سے ڈاکٹر یاسمین راشد، اعجاز چوہدری، عمر سرفراز چیمہ، میاں محمود الرشید، افضال عظیم پاہٹ، خالد پاہٹ، حمزہ پاہٹ، زیاس خان، علی حسن، رانا تنویر، ریاض حسین، اظہار حسین اور محمد افتخار کے خلاف مقدمے کا چالان عدالت میں پیش کیا گیا تھا۔ پراسیکیوشن نے مقدمے میں 61 گواہوں کے بیانات قلمبند کروائے جب کہ ملزمان کی جانب سے برہان معظم ملک سمیت دیگر وکلاء نے جرح کے بعد حتمی دلائل مکمل کیے۔ یہ مقدمہ سپریم کورٹ کی ہدایت پر روزانہ کی بنیاد پر چلایا گیا اور عدالت نے شواہد و دلائل کی روشنی میں فیصلہ محفوظ کر لیا۔ واضح رہے کہ لاہور میں نو مئی کے واقعات سے متعلق مجموعی طور پر 12 مقدمات انسداد دہشتگردی عدالتوں میں زیرِ سماعت ہیں۔