وزیراعظم شہباز شریف کا کہنا ہے ایران اور پاکستان نے 10 ارب ڈالرز کی تجارت کا ہدف مقرر کیا ہے۔

پاکستان کے دورے پر آئے ایرانی صدر سے ملاقات کے بعد مشترکہ پریس کانفرنس کرتے ہوئے وزیراعظم شہباز شریف کا کہنا تھا مسعود پزشکیان بطورایرانی صدر پہلی مرتبہ پاکستان کے دورے پر آئے ہیں، ان کے ساتھ باہمی روابط، تعلقات، بھائی چارے، مذہبی اور جغرافیائی امور سمیت دیگر معاملات پر سیر حاصل گفتگو ہوئی۔

ایران کو پُرامن مقاصد کے لیے جوہری طاقت حاصل کرنے کا پورا حق ہے: وزیراعظم

شہباز شریف کا کہنا تھا آج ایران کے ساتھ کئی ایم او یوز پر دستخط ہوئے ہیں، خواہش ہے بہت جلد یہ معاہدوں کی شکل اختیار کریں، ایران اور پاکستان نے 10 ارب ڈالرز کی تجارت کا ہدف مقرر کیا ہے۔

ان کا کہنا تھا کہ جون میں اسرائیل نے بغیر کسی وجہ کے ایران کے خلاف جارحیت کی، پاکستان اور یہاں کے عوام نے ایران پر اسرائیلی حملے کی مذمت کی۔

انہوں نے کہا کہ ایران کو پُرامن مقاصد کے لیے جوہری طاقت حاصل کرنے کا پورا حق ہے، پاکستان پرامن مقاصد کے لیے جوہری توانائی کے حصول کے ایرانی مؤقف کے ساتھ کھڑا ہے، اچھے وقت میں سب دوست ہوتے ہیں، اصل دوست وہ ہوتا ہے جوبرے وقت میں ہاتھ تھامے۔

وزیراعظم شہباز شریف کا کہنا تھا اسرائیلی جارحیت میں شہید ہونے والے ایرانی بھائیوں اور جرنیلوں کے درجات کی بلندی کے لیے دعا گو ہیں، کسی قسم کی دہشت گردی کو برداشت نہیں کیا جائے گا۔

شہباز شریف نے غزہ میں فوری سیز فائر پر زور دیتے ہوئے کہا کہ غزہ میں تاحال اسرائیلی مظالم جاری ہیں، غزہ میں نومولود بچوں کو قتل کیا جا رہا ہے، خواتین اور جوانوں کو شہید کیا جا رہا ہے، دنیا کو غزہ میں امن کے لیے متحد ہونا ہو گا۔انہوں نے کہا کہ مقبوضہ کشمیر کی صورت حال بھی غزہ سے مختلف نہیں ہے۔

بہترین مہمان نوازی پر پاکستانی قوم کا شکریہ، پاکستان ہمارا دوسرا گھر ہے: ایرانی صدر

ایرانی صدر مسعود پزشکیان نے بہترین مہمان نوازی پر پاکستانی قوم کا شکریہ ادا کیا، انہوں نے کہا کہ پاکستان ہمارا دوسرا گھر ہے۔ مسعود پزشکیان کا کہنا تھا اسرائیلی جارحیت کے خلاف پاکستان کی حمایت پر دل سے شکر گزار ہیں، عصر حاضر میں امت مسلمہ کے اتحاد کی سخت ضرورت ہے۔

ان کا کہنا تھا پاکستان کے ساتھ اچھے تعلقات ایران کی خارجہ پالیسی کا اہم جزو ہے، مشترکہ اقتصادی زونز کے قیام اور سرحدی تجارت کے لیے اقدامات کیے جا رہے ہیں۔