وزیر دفاع خواجہ آصف کی جانب سے ڈمپر امپورٹ کی سب سے زیادہ کلیئرنس نوشہرہ میں ہونے سے متعلق بیان کی حقیقت سامنے آگئی۔
اس حوالے جب جاننے کی کوشش کی گئی تو کسٹم ذرائع نے نام نہ ظاہر کرنے کی شرط پر بتایا کہ ضلع نوشہرہ میں میکسر ٹرک (ڈمپر) کی گزشتہ کئی سال سے اضاخیل ڈرائی پورٹ پر کلیئرنس نہیں ہوئی، اس سے قبل پنجاب کے تاجر میکسر ٹرک امپورٹ کرکے اضاخیل میں کلیئرنس کرتے تھے۔ اب اضاخیل ڈارئی پورٹ پر پہلے سے کام بھی کم ہوا ہے جبکہ ڈمپر کی کلیئرنس مکمل طور پر ختم ہوچکی ہے۔
ذرائع کے مطابق اضاخیل میں صرف گزشتہ سال ڈمپر کلیئرنس کا پرانا کیس جو سپریم کورٹ میں چل رہا تھا عدالتی حکم پر کلیئر کیا گیا تھا، مذکورہ کیس 2016 اور 2018 کا تھا جسے عدالتی حکم پر کلیئر کیا گیا تھا جس سے حکومت نے تمام ڈیوٹی بھی وصول کی تھی۔
کسٹم ذرائع کے مطابق کسی بھی پورٹ پر گاڑیوں کی کلیئرنس قانون کے مطابق ہوتی ہے سب سے زیادہ گاڑیوں کی کلیئرنس کراچی میں ہو رہی ہے۔