راولپنڈی کے علاقے جھنڈا چچی میں ٹریفک وارڈن کی جانب سے ایک شہری پر مبینہ تشدد کا واقعہ پیش آیا ہے، جس کی ویڈیو سوشل میڈیا پر وائرل ہو گئی۔
عینی شاہدین کے مطابق ٹریفک وارڈن نے موٹر سائیکل سوار نوجوان کو رکنے کا اشارہ کیا، جس پر نوجوان نے وارڈن کے سامنے ہی موٹر سائیکل روک دی۔ تاہم وارڈن نے غصے میں آ کر مبینہ طور پر نوجوان پر وائرلیس سیٹ پھینک دیا۔
وائرلیس لگنے سے نوجوان شدید زخمی ہو گیا۔ وائرل ویڈیو میں ٹریفک وارڈن اور زخمی شہری کو موقع پر موجود دیکھا جا سکتا ہے۔
واقعے کے بعد شہریوں میں شدید غم و غصہ پایا جاتا ہے۔ عوام نے ٹریفک پولیس کے رویے پر سخت تشویش کا اظہار کرتے ہوئے اعلیٰ حکام سے فوری نوٹس لینے کا مطالبہ کیا ہے۔
شہریوں کا کہنا ہے کہ ذمہ دار ٹریفک وارڈن کے خلاف سخت محکمانہ اور قانونی کارروائی کی جائے تاکہ آئندہ ایسے واقعات کی روک تھام ہو سکے۔