خیبرپختونخوا کے مختلف اضلاع میں بارش اور ندی نالوں میں طغیانی سے 16 افراد جاں بحق، 8 زخمی اور متعدد لاپتہ ہوگئے۔ دیر، باجوڑ اور ایبٹ آباد میں شدید بارش کے باعث مکانات منہدم ہونے کے واقعات پیش آئے۔
ضلع لوئر دیر کے علاقے میدان سوری پاؤ میں مکان کی چھت گرنے سے 5 افراد جاں بحق اور 4 زخمی ہوئے جن میں خواتین و بچے شامل ہیں۔ ریسکیو ٹیموں اور مقامی افراد نے ملبے سے 7 افراد کو نکال لیا جبکہ مزید اموات کا خدشہ ظاہر کیا جا رہا ہے۔
ضلع باجوڑ کے جبراڑئی اور سلارزئی میں لینڈ سلائیڈنگ اور سیلابی ریلے سے 9 افراد جاں بحق اور 4 زخمی ہوئے جب کہ مقامی ذرائع کے مطابق 17 افراد تاحال لاپتہ ہیں۔جن کی تلاش کے لیے ریسکیو آپریشن جاری ہے۔
حکام نے شہریوں اور سیاحوں کو بارش کے دوران غیر ضروری سفر سے گریز کی ہدایت دی ہے۔