پاکستان نے اسرائیل کے نام نہاد گریٹر اسرائیل کے قیام اور غزہ سے فلسطینیوں کی جبری بے دخلی سے متعلق بیانات کو مسترد کرتے ہوئے سخت مذمت کی ہے۔
ترجمان دفتر خارجہ کے مطابق پاکستان نے عالمی برادری سے مطالبہ کیا ہے کہ وہ ایسے اشتعال انگیز اور غیر قانونی عزائم کو یکسر مسترد کرے جو بین الاقوامی قانون، اقوام متحدہ کے چارٹر اور متعلقہ قراردادوں کی کھلی خلاف ورزی ہیں۔
پاکستان نے کہا کہ یہ بیانات قابض اسرائیل کے غیر قانونی قبضے کو مزید مستحکم کرنے اور خطے میں دیرپا امن و استحکام کے لیے جاری تمام بین الاقوامی کوششوں کو نظرانداز کرنے کے عزائم کی عکاسی کرتے ہیں۔
ترجمان دفتر خارجہ نے کہا کہ عالمی برادری کو چاہیے کہ وہ فوری اور مؤثر اقدامات کرے تاکہ اسرائیل خطے کو مزید عدم استحکام سے دوچار نہ کر سکے اور فلسطینی عوام کے خلاف جاری جرائم و مظالم کا خاتمہ ہو۔
پاکستان نے ایک بار پھر فلسطینی عوام کے جائز حقوق کی مکمل حمایت کا اعادہ کیا جن میں حق خود ارادیت اور 1967ء سے پہلے کی سرحدوں پر قائم ایک آزاد، خودمختار فلسطینی ریاست کا قیام شامل ہے اور جس کا دارالحکومت مشرقی بیت المقدس ہو۔