گجرات کے نواحی علاقے کھیوہ میں پیش آنے والے دل دہلا دینے والے واقعے نے لوگوں کو غم اور غصے میں مبتلا کر دیا۔ نامعلوم افراد نے ایک محنت کش کی حاملہ بھینس پر کلہاڑیوں سے حملہ کیا اور اس کی دونوں اگلی ٹانگیں کاٹ دیں۔ بے زبان جانور کئی گھنٹے تک تڑپتا رہا جبکہ مالک اور اہلِ علاقہ بے بسی سے یہ منظر دیکھتے رہے۔ یہ بھینس اس خاندان کے روزگار کا واحد سہارا تھی، جو اب شدید صدمے اور مالی نقصان سے دوچار ہے۔
پولیس نے واقعے کا مقدمہ تھانہ صدر جلالپور جٹاں میں درج کر لیا ہے اور نامزد ملزمان کی گرفتاری کے لیے چھاپے مارے جا رہے ہیں۔ تفتیشی حکام کے مطابق یہ پتہ لگانے کی کوشش کی جا رہی ہے کہ یہ حملہ ذاتی دشمنی کا نتیجہ تھا یا حسد میں کیا گیا۔ مقامی افراد نے اس واقعے پر سخت تشویش کا اظہار کرتے ہوئے مطالبہ کیا ہے کہ زخمی بھینس کا سرکاری سطح پر فوری علاج کیا جائے تاکہ وہ زندہ بچ سکے۔
یہ پہلا واقعہ نہیں ہے کہ کسی جانور کو اس طرح نشانہ بنایا گیا ہو۔ گزشتہ برس سندھ کے ضلع سانگھڑ میں ایک بااثر شخص نے کھیت میں گھسنے پر اونٹنی کی ٹانگ کاٹ دی تھی، جس کے بعد ملوث افراد کو گرفتار کیا گیا اور جانور کو کراچی منتقل کر کے خصوصی نگہداشت فراہم کی گئی۔ بعد میں بینجی پروجیکٹ کی ٹیم نے اطلاع دی کہ اونٹنی مصنوعی ٹانگ کی مدد سے کھڑے ہونے کے قابل ہو گئی ہے۔