اسرائیلی وفد کے بعد حماس کے رہنما بھی مصر کے شہر شرم الشیخ پہنچ گئے ہیں۔ مصر اور قطر کی ثالثی میں یہ فلسطینی اور اسرائیلی وفود کے درمیان بالواسطہ مذاکرات کے نئے دور کا آغاز ہے۔ اس کا مقصد غزہ میں جنگ بندی کے معاہدے کی تفصیلات طے کرنا ہے۔
- مصر میں بالواسطہ مذاکرات کے لیے اسرائیل اور حماس کے وفود مصر میں موجود ہیں۔ اس دوران امریکی صدر ڈونلڈ ٹرمپ کی جانب سے دیے گئے غزہ میں قیام امن کے منصوبے کی تفصیلات طے کی جائیں گی
- حماس نے ٹرمپ کے 20 نکاتی منصوبے کے بعض حصوں پر اتفاق کیا ہے جن میں اسرائیلی یرغمالیوں کی رہائی بھی شامل ہے
- حماس کے وفد کی قیادت خلیل الحیہ کریں گے جنھیں گذشتہ ماہ اسرائیل نے دوحہ میں قتل کرنے کی کوشش کی تھی
- اتوار کی شب ٹرمپ نے سبھی فریقین کو جلد معاملات طے کرنے کا کہا تھا۔ ان کا مطالبہ ہے کہ پہلا مرحلہ اسی ہفتے مکمل ہو جانا چاہیے
- غزہ پر اسرائیلی بمباری جاری ہے۔ سول ڈیفنس کا کہنا ہے کہ گذشتہ 24 گھنٹوں کے دوران 24 فلسطینی ہلاک ہوئے ہیں
- ادھر پاکستان میں حکومتی اتحاد میں شامل پاکستان پیپلز پارٹی نے پیر کو سینیٹ اور قومی اسمبلی کے اجلاسوں سے واک آؤٹ کیا ہے اور پنجاب کے وزرا سے بلاول بھٹو سے متعلق بیانات پر معافی مانگنے کا مطالبہ کیا ہے
ٹرمپ کا غزہ میں قیام امن کا منصوبہ: حماس اور اسرائیل کے وفود بالواسطہ مذاکرات کے لیے مصر میں موجود
