الیکشن کمیشن آف پاکستان نے قومی اسمبلی کے حلقہ این اے 18 ہری پور میں ضمنی انتخاب کا باضابطہ شیڈول جاری کر دیا ہے۔ یہ نشست سابق اپوزیشن لیڈر عمر ایوب کی نااہلی کے باعث خالی ہوئی تھی۔
الیکشن کمیشن کے اعلامیہ کے مطابق ضمنی انتخاب کی پولنگ 23 نومبر 2025 کو منعقد ہوگی۔امیدوار 15 سے 17 اکتوبر تک اپنے کاغذاتِ نامزدگی جمع کرا سکیں گے جن کی اسکروٹنی 22 اکتوبر تک مکمل کر لی جائے گی۔
شیڈول کے مطابق کاغذاتِ نامزدگی پر اعتراضات پر فیصلے 22 اکتوبر تک نمٹائے جائیں گے جبکہ اپیلوں کی سماعت اور فیصلے 3 نومبر کو کیے جائیں گے۔
نظرثانی شدہ امیدواروں کی فہرست 4 نومبر کو جاری کی جائے گی اور کاغذاتِ نامزدگی واپس لینے کی آخری تاریخ 5 نومبر مقرر کی گئی ہے جبکہ انتخابی نشان 6 نومبر کو الاٹ کیے جائیں گے۔
الیکشن کمیشن کے مطابق ضمنی انتخاب کے دوران انتخابی ضابطہ اخلاق پر سختی سے عمل درآمد یقینی بنایا جائے گا جبکہ ضلع ہری پور کے ریٹرننگ افسر کو انتخابی عمل کی نگرانی کا مکمل اختیار دیا گیا ہے۔
الیکشن کمیشن نے سیاسی جماعتوں اور امیدواروں سے اپیل کی ہے کہ وہ الیکشن ضابطہ اخلاق کی مکمل پابندی کریں تاکہ شفاف، منصفانہ اور پرامن انتخابی عمل ممکن بنایا جا سکے۔