پنجاب حکومت نے شادیوں، تقریبات اور فارم ہاؤسز میں ون ڈش کی خلاف ورزیوں اور لاؤڈ اسپیکر کے غیر ضروری استعمال کے خلاف سخت اقدامات کرنے کا فیصلہ کر لیا ہے۔
وزیراعلیٰ پنجاب مریم نواز کے زیر صدارت اجلاس میں تمام کمشنرز اور ڈپٹی کمشنرز کو ہدایت کی گئی کہ شادی ہالز، فارم ہاؤسز اور گراؤنڈز میں ون ڈش کی پابندی ہر صورت یقینی بنائی جائے۔
اجلاس میں شادیوں اور تقریبات میں بلند آواز میوزک پر سخت کارروائی کی ہدایت بھی دی گئی جبکہ فارم ہاؤسز اور گراؤنڈز میں لاؤڈ اسپیکر کے غیر قانونی استعمال پر پابندی کے لیے عملی اقدامات کرنے کا اصولی فیصلہ کیا گیا۔
صوبائی حکومت نے یہ واضح کر دیا ہے کہ میرج ہالز کے لیے مقررہ اوقات کار کی پابندی کی باقاعدہ مانیٹرنگ بھی کی جائے گی تاکہ ون ڈش اور لاؤڈ اسپیکر کے غیر قانونی استعمال کو مکمل طور پر روکا جا سکے۔