شارجہ سے جعلی ویزوں کے ذریعے برطانیہ جانے کی کوشش کرنے والے 5 پاکستانی شہریوں کو متحدہ عرب امارات حکام نے ڈی پورٹ کر دیا۔ ڈی پورٹ کیے گئے مسافروں کو لاہور ایئرپورٹ پہنچتے ہی ایف آئی اے نے حراست میں لے لیا۔
ایف آئی اے کے ترجمان کے مطابق گرفتار ملزمان میں وقار انجم، طیب افتخار، علی شان، ظہیر اور ذیشان شامل ہیں۔ ابتدائی تحقیقات سے معلوم ہوا کہ ملزمان نے رواں سال وزٹ ویزا پر لاہور سے ملائیشیا کا سفر کیا تھا اور پھر شارجہ پہنچے۔
رپورٹ کے مطابق ملزمان نے برطانیہ جانے کے لیے جعلی ویزے ایجنٹوں کے ذریعے حاصل کیے اور شارجہ سے روانہ ہونے کی کوشش کی مگر امیگریشن حکام نے جعلی دستاویزات پکڑ کر انہیں روک دیا۔
ایف آئی اے نے تمام ملزمان کو انسدادِ انسانی اسمگلنگ سرکل لاہور منتقل کر دیا ہے جہاں مزید تفتیش جاری ہے۔