خیبر پختونخوا کے نومنتخب وزیر اعلیٰ سہیل آفریدی نے اپنے عہدے کا حلف اٹھا لیا۔ گورنر خیبر پختونخوا فیصل کریم کنڈی نے گورنر ہاؤس پشاور میں ان سے حلف لیا۔
تقریبِ حلف برداری میں اسپیکر خیبر پختونخوا اسمبلی بابر سلیم سواتی، پاکستان تحریک انصاف کے ارکان قومی و صوبائی اسمبلی، آئی جی پولیس، چیف سیکریٹری اور دیگر اعلیٰ حکام نے شرکت کی۔
اس موقع پر پی ٹی آئی کے کارکنان کی بڑی تعداد گورنر ہاؤس کے باہر اور پنڈال میں موجود تھی جو مسلسل پارٹی قیادت کے حق میں نعرے بازی کرتے رہے۔
اس سے قبل نو منتخب وزیر اعلیٰ سہیل آفریدی حلف برداری کے لیے گورنر ہاؤس پہنچے جہاں پارٹی کے سینئر رہنماؤں اور سابق وزرا نے ان کا استقبال کیا۔