دبئی پولیس نے دو گھنٹے سے بھی کم وقت میں 6 لاکھ 60 ہزار درہم کی ڈکیتی میں ملوث دو ملزمان کو گرفتار کر لیا۔
ملزمان کو دبئی انٹرنیشنل ایئرپورٹ سے اس وقت پکڑا گیا جب وہ امارات سے فرار ہونے کی کوشش کررہے تھے۔ دبئی پولیس کے بیان کے مطابق ملزمان نے ایک سپر اسٹور میں ڈکیتی کا منصوبہ بنایا، یہ واردات پہلے سے منصوبہ بندی کے تحت کی گئی۔
رات گئے تیز دھار آلات کی مدد سے سپر مارکیٹ کے پچھلے دروازے کو کاٹ کر ملزمان اندر داخل ہوئے۔ ملزمان نے چار کیش بکس توڑ کر 60 ہزار درہم چوری کیے اور بعد ازاں بڑا سیف کھول کر مزید چھ لاکھ درہم لوٹ کر فرار ہوگئے۔
اگلی صبح واردات کا پتہ اس وقت چلا جب سپر اسٹور کے ملازمین نے ٹوٹا ہوا دروازہ دیکھا اور اس کی اطلاع پولیس کو دی، ڈیوٹی افسر، فرانزک ماہرین اور سی ڈی آئی تفتیش کاروں پر مشتمل ٹیم موقع پر پہنچ گئی اور شواہد کا جائزہ لیا۔
پولیس کے مطابق اگرچہ ملزمان نے ماسک پہن کر اپنی شناخت چھپانے کی کوشش کی تاہم پولیس افسران ملزمان کی موومنٹ کو ٹریس کرنے میں کامیاب رہے اور بلآخر انہیں ملک سے فرار ہونے سے قبل دبوچ لیا۔