اسلام آباد میں انتخابی عمل سے متعلق اہم پیش رفت سامنے آئی ہے۔ الیکشن کمیشن آف پاکستان نے نگراں حکومت کی مدت میں توسیع کی سفارش کر دی ہے۔ کمیشن کے مطابق اگر پارلیمنٹ تحلیل ہو جائے تو موجودہ قانون کے تحت 90 روز میں عام انتخابات کا انعقاد لازم ہوتا ہے مگر اس محدود مدت میں انتخابی تیاریوں کی تکمیل ایک بڑا چیلنج بن جاتی ہے۔
الیکشن کمیشن کا کہنا ہے کہ نئی حلقہ بندیاں، انتخابی فہرستوں کی اپڈیٹیشن اور انتظامی امور کو مؤثر، شفاف اور منصفانہ انداز میں مکمل کرنے کے لیے اضافی وقت درکار ہوتا ہے۔ اسی پیش نظر کمیشن نے عام انتخابات کے لیے مقررہ مدت کو 90 کے بجائے 120 روز کرنے کی سفارش کی ہے۔
یہ اہم تجویز آئینی ترمیم کے ذریعے پارلیمنٹ میں پیش کی جائے گی جس کی منظوری کے بعد قانونی نظام میں تبدیلی ممکن ہو گی۔ کمیشن کا کہنا ہے کہ اس سے انتخابی عمل مزید بہتر، شفاف اور جامع بنایا جا سکے گا جبکہ انتظامی دباؤ میں بھی کمی آئے گی۔