وزیر اطلاعات سندھ شرجیل انعام میمن نے کہا ہے کہ سندھ جاب پورٹل کے تحت اب تک تین لاکھ 26 ہزار سے زائد امیدوار اہل قرار پاچکے ہیں۔ امیدوار مختلف سرکاری و نجی اداروں میں میرٹ پر مبنی بھرتیوں کے لیے رجسٹرڈ ہوئے ہیں۔
شرجیل انعام میمن نے کہا کہ سندھ جاب پورٹل پورٹل ایک خودکار اور جدید نظام ہے، درخواست دہندگان کی اہلیت، تعلیم اور تجربے کی بنیاد پر مکمل طور پر ڈیجیٹل اسکریننگ کی جاتی ہے۔
پورٹل کے ذریعے نوجوانوں کو گھر بیٹھے ملازمتوں تک رسائی حاصل ہو رہی ہے، جس سے وقت اور وسائل کی بچت ہو رہی ہے، پورٹل میں گریڈ 5 سے 15 تک کی سرکاری اسامیوں، ٹیکنیکل اور نان ٹیکنیکل ملازمتوں کے علاوہ نجی شعبے کے مواقع بھی شامل کیے گئے ہیں۔
انہوں نے بتایا کہ ہر درخواست دہندہ کا ڈیٹا محفوظ ہے اور میرٹ کے مطابق خودکار طور پر میچنگ کی جاتی ہے، حکومتِ سندھ نوجوانوں کے لیے روزگار کے دروازے کھولنے کے ساتھ ساتھ انہیں جدید مہارتوں سے آراستہ کرنے پر بھی توجہ دے رہی ہے۔
صوبائی وزیر نے کہا کہ حکومتِ سندھ نے میرٹ، شفافیت اور نوجوانوں کے روشن مستقبل پر کوئی سمجھوتہ کیا ہے نہ کرے گی، پورے نظام کی نگرانی شفاف انداز میں کی جا رہی ہے، تمام ریکارڈ آڈٹ کے قابل ہے اور ہر بھرتی کا عمل ڈیجیٹل ٹریس کے تحت محفوظ رہتا ہے۔