آل پاکستان انجمن تاجران کے صدر اجمل بلوچ نے حکومت سے مطالبہ کیا ہے کہ انکم ٹیکس گوشوارے جمع کرانے کی تاریخ میں مزید توسیع کی جائے تاکہ ٹیکس دہندگان کو سہولت فراہم ہو۔
انہوں نے کہا کہ ایف بی آر کا دروازہ گوشوارے داخل کرنے کے لیے ہر وقت کھلا رکھا جائے، کیونکہ اکثر اوقات سسٹم ڈاؤن ہونے کے باعث تاجروں کو گھنٹوں انتظار کرنا پڑتا ہے۔ اجمل بلوچ نے کہا کہ ٹیکس گوشوارے جمع کرانے کے نظام کو فوری طور پر بہتر بنایا جائے تاکہ کاروباری طبقے کو مشکلات کا سامنا نہ ہو۔
صدر انجمن تاجران نے کہا کہ ملک کا زمیندار، صنعتکار اور دکاندار تینوں شدید مشکلات کا شکار ہیں، لہٰذا حکومت ان کے لیے آسانیاں پیدا کرے۔ ان کا کہنا تھا کہ جب تک زمیندار، صنعتکار اور دکاندار خوشحال نہیں ہوں گے، ملک بھی خوشحال نہیں ہو سکتا۔
اجمل بلوچ نے تجویز دی کہ ایف بی آر ٹیکس دہندگان کے لیے "عزت کارڈ" متعارف کرائے تاکہ انہیں اداروں کے اندر عزت و احترام دیا جا سکے۔ انہوں نے شکوہ کیا کہ زبانی طور پر کہا جاتا ہے کہ تاجر ملکی معیشت کی ریڑھ کی ہڈی ہیں، مگر عملی طور پر ایسا نہیں ہے۔
انہوں نے کہا کہ ٹیکس دہندگان کے ٹیکس سے تنخواہ لینے والے افسران انہی کو دفاتر کے باہر انتظار کرواتے ہیں، جو انتہائی افسوسناک رویہ ہے۔ اجمل بلوچ نے وزیر اعظم سے مطالبہ کیا کہ بیوروکریٹس کے تاجروں سے رویے کا فوری نوٹس لیا جائے۔