سندھ سے تعلق رکھنے والے ناخداؤں پر مبینہ تشدد کے خلاف ایڈیشنل سیشن جج گوادر کے حکم پر اسسٹنٹ ڈائریکٹر فشریز پسنی یونس قمبرانی اور فشریز اہلکار کے خلاف پسنی پولیس نے ایف آئی آر درج کرلی۔
ایڈیشنل سیشن جج گوادر نے پسنی میں سندھ سے تعلق رکھنے والے ناخداؤں پر مبینہ تشدد کے الزام میں اسسٹنٹ ڈائریکٹر فشریز پسنی یونس قمبرانی اور فشریز اہلکار محبوب قمر کے خلاف ایس ایچ او پسنی کو ایف آئی آر درج کرنے کا حکم جاری کیا۔
ذرائع کے مطابق عدالتی حکم کے بعد پسنی پولیس نے یونس قمبرانی اور فشریز اہلکار کے خلاف ایف آئی آر نمبر 87/25 زیر دفعات 337/506/342/24 ت پ درج کرلی ہے۔
واضح رہے کہ ناخداؤں نے الزام عائد کیا تھا کہ اسسٹنٹ ڈائریکٹر فشریز نے اپنے ماتحت اہلکار کے ساتھ مل کر اُنھیں غیرقانونی طور پر جڈی ہور کے مقام پر تشدد کا نشانہ بنایا اور غیر قانونی طور پر ہراساں کیا گیا، اس معاملے پر عدالت نے نوٹس لیتے ہوئے فوری کارروائی کا حکم دیا، جس پر پولیس نے ایکشن لیا۔
متاثرہ ناخداؤں کی جانب سے عارف بلوچ ایڈووکیٹ نے مقدمہ کی پیروی کی۔