آئی ایس پی آر کے مطابق سیکیورٹی فورسز نے 16 اور 17 نومبر کو خیبرپختونخوا کے مختلف علاقوں میں دو علیحدہ انٹیلیجنس بیسڈ آپریشنز کیے، جن میں بھارت کے حمایت یافتہ فتنے “الخوراج” سے تعلق رکھنے والے 23 دہشتگرد ہلاک کر دیے گئے۔
باجوڑ میں دہشتگردوں کی موجودگی کی اطلاع پر آپریشن کیا گیا۔ فورسز نے ٹھکانے کو مؤثر انداز میں نشانہ بنایا جس کے نتیجے میں 11 دہشتگرد ہلاک ہوئے، جن میں اہم سرغنہ سجاد عرف ابوزر بھی شامل ہے۔
ایک اور کارروائی کے دوران ڈسٹرکٹ بنوں میں سیکیورٹی فورسز نے مزید 12 دہشتگردوں کو ٹھکانے لگا دیا۔
آئی ایس پی آر کے مطابق علاقے میں مزید ممکنہ بھارتی سرپرستی میں سرگرم عناصر کی تلاش کے لیے سینیٹائزیشن آپریشنز جاری ہیں۔ ترجمان نے کہا کہ ’’ویژن عزمِ استحکام‘‘ کے تحت دہشتگردی کے خاتمے کے لیے فورسز اور قانون نافذ کرنے والے ادارے بھرپور رفتار سے کارروائیاں جاری رکھیں گے۔
آئی ایس پی آر نے اس عزم کا اعادہ کیا کہ پاکستان کی سرزمین سے دہشتگردی کے مکمل خاتمے تک یہ کارروائیاں جاری رہیں گی۔