ایشین ڈیولپمنٹ بینک کے وفد نے کنٹری ڈائریکٹر ایما فین کی قیادت میں سینئر وزیر شرجیل انعام میمن سے ملاقات کی، وفد میں ڈپٹی کنٹری ڈائریکٹر اسد علیم، پروجیکٹ آفیسر حامد خان، خیّام عباسی اور سید عدنان شامل تھے۔
ملاقات میں سیکریٹری ٹرانسپورٹ اسد ضامن اور سی ای او ٹرانس کراچی فواد غفار سومرو بھی شریک تھے، سینئر وزیر شرجیل انعام میمن کی جانب سے مہمانوں کا خیرمقدم کیا گیا۔
ملاقات کے دوران ای ڈی بی کے وفد کو ریڈ لائن بی آر ٹی کے موجودہ مرحلوں، تعمیراتی رفتار اور تکنیکی امور پر تفصیل سے بریفنگ دی گئی، شرجیل انعام میمن نے بتایا کہ حکومتِ سندھ اس منصوبے کو تیزی سے مکمل کرنے کے لیے دن رات کام کر رہی ہے۔
شرجیل انعام میمن نے کہا کہ ریڈ لائن بی آر ٹی میں یوٹیلٹیز کی منتقلی بڑا چیلنج تھا، بیشتر تکنیکی مسائل حل کرلیے گئے ہیں اور بقیہ معاملات بھی مربوط حکمت عملی سے نمٹائے جا رہے ہیں۔
شرجیل میمن نے کہا کہ حکومتِ سندھ کو اے ڈی بی کے ساتھ کام کر کے خوشی ہوتی ہے اور ادارے کے تعاون کو قدر کی نگاہ سے دیکھا جاتا ہے۔ انہوں نے مزید کہا کہ ریڈ لائن بی آر ٹی کو جلد مکمل کرکے شہریوں کو جدید سفری سہولت فراہم کی جائے گی۔
ایشین ڈیولپمنٹ بینک کے وفد نے منصوبے کی رفتار اور انتظامی کوششوں پر اطمینان کا اظہار کرتے ہوئے کہا کہ ریڈ لائن بی آر ٹی کو ایک بہترین اور ایوارڈ وننگ منصوبے کے طور پر دیکھنا چاہتے ہیں۔
کنٹری ڈائریکٹر ایشن ڈیولپمنٹ بینک نے کہا کہ محکمہ ٹرانسپورٹ سندھ کے ساتھ ان کا تعاون مؤثر اور مسلسل ہے، مشترکہ کوششوں سے کراچی کے شہریوں کو معیاری ٹرانسپورٹ سہولت فراہم کی جاسکے گی۔