متحدہ عرب امارات نے ایک بار پھر دنیا کو حیران کر دیا ہے جب دبئی ملٹی کموڈٹیز سینٹر نے دنیا کی سب سے بڑی چاندی کی اینٹ کی نقاب کشائی کی۔ یہ دیوقامت اینٹ 1,971 کلوگرام وزنی ہے جو متحدہ عرب امارات کے قیام کے سال 1971 کی نمائندگی کرتی ہے اور اسی خاصیت کے باعث اس نے گنیز ورلڈ ریکارڈ اپنے نام کر لیا ہے۔
عرب میڈیا کے مطابق یہ تاریخی لمحہ 24 نومبر کو دبئی پریشیس میٹلز کانفرنس کے دوران رونما ہوا جہاں دنیا بھر سے قیمتی دھاتوں کے ماہرین اور سرمایہ کار شریک تھے۔
ڈی ایم سی سی کے ایگزیکٹو چیئرمین اور سی ای او احمد بن سلیم نے کہا کہ کانفرنس کے 13ویں ایڈیشن میں کئی اہم سنگ میل عبور کیے گئے جن میں سب سے نمایاں یہ عظیم الشان چاندی کی اینٹ تھی۔ اینٹ کی لمبائی 1.3 میٹر ہے اور یہ منفرد کاریگری کی مثال ہے۔
حکام کے مطابق اس اینٹ کا وزن نہ صرف متحدہ عرب امارات کی تاسیس کے سال کی نمائندگی کرتا ہے بلکہ یہ ملک کی اختراع، کاریگری اور عالمی سطح پر بڑھتے اثر و رسوخ کی علامت بھی ہے۔